Հայ պատգամավորներն էական ազդեցություն և փոփոխություն չեն կարող ունենալ Թուրքիայի քաղաքականության մեջ. Արա Պապյան

Past.am-ը զրուցել է «Մոդուս վիվենդի» վերլուծական կենտրոնի նախագահ Արա Պապյանի հետ և պարզել՝ ինչպիսի ազդեցություն կունենա ուժերի նոր հարաբերակցությունը թուրքական խորհրդարանում` ներքին և արտաքին զարգացումնրի վրա:

Արա Պապյանը մասնավորապես նշել է. «Հիմնական փոփոխությունն այն է, որ Էրդողանը և իր կուսակցությունը՝ «Արդարություն և զարգացում»-ը, այլևս չունի միահեծան իշխանություն և ստիպված կլինի կոալիցիա ձևավորել: Փորձը ցույց է տալիս, որ Թուրքիայում կոալիցիոն կառավարությունները անկայուն են: Հնարավոր է, որ այս կառավարությունն էլ երկար չտևի:

Այստեղ նաև պետք է հաշվի առնել որ Քրդական կուսակցությունը բավականին ակտիվ ներկայացված է խորհրդարանում և դա էլ կունենա իր ազդեցությունը: Մյուս հանգամանքն այն է, որ ընտրվել են հայազգի պատգամավորներ: Այստեղ շեշտում եմ հայազգի, ոչ թե հայ, որովհետև իրենք միայն ծագումով են հայ, քանի որ չեն ներկայացնում հայ համայնքը: Նրանք երեք տարբեր կուսակցությունների անդամներ են: Ինչ-որ հայերին վերաբերվող հարցեր գուցե հնչեցվեն, բայց ոչ ավելին: Այդ պատգամավորները էական ազդեցություն և փոփոխություն չեն կարող ունենալ Թուրքիայի քաղաքականության մեջ»:

Past.am-ի հարցին՝ ի՞նչ դժգոհություններ ուներ թուրքական հասարակությունը, որ իշխող կուսակցությունը չկարողացավ կրկին կազմել մեծամասնություն, վերլուծաբանը պատասխանեց. «Կարծում եմ հիմնական դժգոհությունը նրանում էր, որ Էրդողանը երկիրը տանում էր դեպի պահպանողական համակարգ, դեպի կրոնապետություն: Չմոռանանք նաև, որ նեոօսմանիզմի քաղաքականություն է հռչակվել և Դավութօղլուն դրա ջատագովներից է:

Հաշվի առնենք նաև, որ երկու լուրջ գործոն կար, որոնց նկատմամբ Էրդողանը հաղթանակ տարավ, բայց դրանք անհետք չմնացին. մեկը` բանական էր, որ Էրդողանին հաջողվեց թուլացնել բանակի դերակատարումը, մյուսը՝ Գյուլենի կազմակերպության անդամներն էին: Այդ ուժերի ազդեցությունը Թուրքիայում թուլացավ, սակայն նրանք  ընտրություններում խանգարեցին իշխող կուսակցությանը»:

Լևոն Փանոսյան