«Ոչ թալանին» նախաձեռնությունը վերջնագիր ներկայացրեց իշխանություններին

Ժամեր առաջ Երևանի Ազատության հրապարակում մեկնարկեց «Ոչ թալանին» նախաձեռնության հանրահավաքը՝ ընդդեմ էլեկտրաէներգիայի թանկացման,- հայտնում է Past.am-ը:

Հավաքին ներկա էին նաև քաղաքական գործիչներ ՀԱԿ-ից, «Ժառանգությունից», «Հիմնադիր խորհրդարանից», «Ազգային վերածնունդ» շարժումից և այլ ուժերի ներկայացուցիչներ:

«Ոչ թալանին» նախաձեռնության անդամ Արամ Մանուկյանն իր ելույթում նշեց․ « Չենք հադուրժելու կեղեքված ժողովրդի ավելի մեծ թալանը։ Սա ՀՀ քաղաքացու պայքարն է` անկախ կուսակցական հայացքներից։ Մեր պահանջներն ուղղված են Սերժ Սարգսյանին ու Հովիկին Աբրահամյան»: Արամ Մանուկյանը ՀԾԿՀ նախագահ Ռոբերտ Նազարյանին անվանեց «Սերժ Սարգսյանի մունետիկ»։

Նախաձեռնության մեկ այլ անդամ՝ Վաղինակ Շուշանյանը, հավաքված հանրությանը հայտարարեց, որ հանրահավաքը վերածում են նստացույցի:

«Այսօր Հայաստանում բնակվող անձինք գտնվում են ծանր սոցիալական պայմաններում և ի վիճակի չեն վճարել անհիմն թանկացումների համար: Մենք մնալու ենք եւ պայքարելու մինչեւ վերջ, այստեղ կմնանք մինչեւ երկուշաբթի ժամը 19.00-ն: Եթե իշխանությունները մինչ այդ հանդես չգան հայտարարությամբ այն մասին, որ հոսանքի գինը չի բարձրանալու, կշարժվենք Բաղրամյան 26», -ասաց Վաղինակ Շուշանյանը:

Քիչ առաջ բախումներ եղան ոստիկանների և նստացույց անող քաղաքացիների միջև: Ակտիվիստները անվադողեր էին բերել Ազատության հրապարակ ու նստել դրանց վրա:

Ոստիկանները պահանջեցին հեռացնել անվադողերը հրապարակից, երիտասադները հրաժարվեցին, պնդելով, որ անվադողերը ծառայում են, որպես աթոռ:

Այս պահին Ազատության հրապարակում երաժշտություն է և ուրախ մթնոլորտ:

Լևոն Փանոսյան