Կիև վագներցիներ են ուղարկվել՝ Զելենսկիին սպանելու համար

Կիևում ավելի քան 400 «վագներցիներ» են գործում, գրում է The Times-ը, որոնց Կրեմլը պատվիրել է սպանել նախագահ Վլադիմիր Զելենսկիին և նրա կառավարությանը՝ հիմք ստեղծելով Ռուսաստանի կողմից իշխանության գրավման համար։

The Times-ը գրում է․ ««Վագների խումբ» մասնավոր ռազմական ընկերությունը, որը ղեկավարվում է նախագահ Պուտինի ամենամոտ դաշնակիցներից մեկի՝ օլիգարխ Եվգենի Պրիգոժինի կողմից, հինգ շաբաթ առաջ վարձկաններ է ուղարկել Աֆրիկայից՝ Զելենսկիի կառավարությանը սպանելու առաքելությամբ՝ մեծ աշխատավարձի դիմաց»:

Հաղորդվում է, որ նրանց մտադրության մասին լուրերը շաբաթ առավոտյան հասել են Ուկրաինայի կառավարությանը, իսկ մի քանի ժամ անց Կիևը 36-ժամյա պարետային ժամ հայտարարեց՝ քաղաքը ռուս դիվերսանտներից մաքրելու համար:

Քաղաքի իշխանությունները զգուշացրել են քաղաքացիներին, որ ցանկացած ոք, ով փողոց դուրս կգա պարետային ժամի ժամանակ, կհամարվի Կրեմլի գործակալ և կարող է լիկվիդացվել։

Նշենք, որ «Վագների խումբը» զինված խմբավորում է, որը ԶԼՄ-ներում հաճախ անվանում են ռուսական մասնավոր ռազմական ընկերություն («ЧВК Вагнера», «ЧВК „Вагнер“»): Ենթադրվում է, որ 2014 թվականից խմբավորումը գործում է Ուկրաինայի տարածքում, այնուհետև Սիրիայում։

Փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հանդես է եկել ուղերձով՝ հայտնելով Դոնբասում հատուկ ռազմական օպերացիա սկսելու որոշման մասին։