«Փաշինյանը միշտ կատարում է այն խնդիրը, որ իր առջև դնում է գլոբալիստական էլիտան»․ «Փաստ»

«Փաստ» օրաթերթը գրում է

19rusinfo.ru-ն «Փաշինյանը հանձնում է Ղարաբաղը. Բաքուն և Երևանը շուտով կարող են խաղաղության պայմանագիր ստորագրել» վերնագրով հոդվածում գրում է, որ անցյալ շաբաթ Մոսկվայում կայացած Եվրասիական տնտեսական բարձրագույն խորհրդի նիստի ժամանակ Հայաստանի և Ադրբեջանի ղեկավարների միջև փոքր փոխհրաձգությունից հետո պարզ դարձավ, որ մոտ ապագայում խաղաղության պայմանագրի կնքումն իսկապես կարող է հարցականի տակ լինել։ Բայց ավելի մեծ հարց է այն, թե ի՞նչ է ստանալու Ռուսաստանը իրավիճակի այս կամ այն զարգացման արդյունքում։ Շատ փորձագետների շրջանում անհանգստություն է առաջացնում նույն Հայաստանի ղեկավարության գործողությունների բարեկամական լինելը:

«Երբ գնահատում ենք Փաշինյանի գործողությունները, պետք է նկատի ունենալ, որ նա Սորոսի գործակալ է, այսինքն՝ գլոբալիզացիայի, գլոբալիստների, անդրազգային լիբերալ հետմարդկայնության էլիտայի գործակալ,- ասել է Աշխարհաքաղաքական փորձագիտական կենտրոնի տնօրեն Վալերի Կորովինը,- ինչ էլ ասվի, որքան էլ փորձեն սպիտակեցնել նրան հայերի և ռուսների կամ ադրբեջանցիների աչքում, դա անդառնալի փաստ է։ Նա իրեն չի պատկանում, միշտ կատարում է այն խնդիրը, որ իր առջև դնում է գլոբալիստական էլիտան։ Այդ գաղափարական հիմքից էլ ելնելով պետք է մեկնաբանել նրա գործողությունները։ Հայաստանում ուկրաինական սցենարով դասական 100 տոկոսանոց մայդան է եղել: Հայաստանին պատրաստվում են երկրորդ Ուկրաինայի դերին, ինչպես և Մոլդովային։ Նրանք մրցում են, թե ով կլինի երկրորդ Ուկրաինան՝ Մոլդովա՞ն, թե՞ Հայաստանը»։

Հարց.- Ինչո՞ւ է Փաշինյանը համաձայնել ԼՂ-ն ճանաչել Ադրբեջանի կազմում:

Պատասխան.- Ղարաբաղի ճանաչումն ուղղված է Ռուսաստանի ռազմական ներկայությունը Հարավային Կովկասի տարածքից դուրս բերելուն։ Եվ դա պետք է դիտարկել այն սպառնալիքների հետ միասին, որոնք կիրականանան, եթե Ռուսաստանը համապատասխան գործողություններ չձեռնարկի։ Գլոբալիստ ստրատեգները Փաշինյանից պահանջում են հեռացնել ռուսական ներկայությունը: Ռուս խաղաղապահները հիմա ներկա են Անդրկովկասում, քանի որ ապահովում են Ղարաբաղում ապրող հայերի անվտանգությունը։ Դա անհրաժեշտ է, քանի որ Ղարաբաղի պատճառով Հայաստանի և Ադրբեջանի միջև կարող է ռազմական հակամարտություն սկսվել, որը նախկինում Ռուսաստանն է դադարեցրել։ Ուրեմն, պարզապես պետք է վերացնել հակամարտության նախադրյալը, և դրանից հետո կվերանա Ղարաբաղում ռուսական ներկայության անհրաժեշտությունը։ Այդպես են մտածում գլոբալիստները:

Այսինքն, նրանց նպատակն է ապահովել, որ Անդրկովկասում ռուսներ չլինեն։ Գլոբալիստները թքած ունեն այն հայերի վրա, որոնց անվտանգությունը ոչ ոք չի ապահովի Ղարաբաղում, և նրանք պարզապես ստիպված կլինեն լքել Ղարաբաղը իրենց անձնական անվտանգության համար։ Գլոբալիստներին չի հետաքրքրում նաև Հայաստանում հայերի անվտանգությունը, նրանց չի հետաքրքրում, թե ինչ կլինի Ղարաբաղի հետ, և ում է այն պատկանելու։ Փաշինյանը հանձնարարություն է ստանում և կատարում, այսինքն՝ հրաժարվում է Ղարաբաղից, և դրանով վերացնում է այնտեղ ռուսական ռազմական ներկայության անհրաժեշտությունը։ Առաջադրանք թիվ մեկը կատարված է:

Հարց.- Բայց Հայաստանում կա ռուսական ռազմաբազա։ Երևանի և Բաքվի միջև համաձայնագրի ստորագրման դեպքում Գյումրիում գտնվող ռազմաբազան պահպանելու հավանականությունը որքա՞ն է։

Պատասխան.- Դա երկրորդ խնդիրն է, այն է՝ փակել Գյումրու ռազմաբազան: Դա անելու համար պետք է դուրս գալ ՀԱՊԿ-ից, քանի որ ռազմաբազան այնտեղ է գտնվում այն հիմքով, որ Հայաստանը ֆորմալ առումով դեռ Ռուսաստանի ռազմական դաշնակիցն է։ ՀԱՊԿ-ից դուրս գալու որոշումն ապահովելու համար իրականացվել են բազմակողմ գործողություններ՝ սադրանքներ են կազմակերպվել ադրբեջանական կողմից, և հայկական կողմը հիստերիկ կերպով պահանջել է ՀԱՊԿ-ի միջամտությունը։ Դա իրականում նշանակում է երկրորդ ճակատ բացել, ինչը բացարձակապես պետք չէ Ռուսաստանին, որը Հատուկ ռազմական գործողություն է իրականացնում Ուկրաինայում, ուստի Պուտինը դիվանագիտական ճանապարհով է լուծել այդ իրավիճակը, իսկ գլոբալիստ փիարիստները արել են ամեն ինչ, որպեսզի ՀԱՊԿ-ը ոտքի չկանգնի Հայաստանի համար, ինչը նշանակում է, որ իմաստ չունի լինել այս կազմակերպությունում։ Ահա ՀԱՊԿ-ից դուրս գալու և, որպես հետևանք, Գյումրու ռազմաբազայի փակման մեդիա հիմնավորումը:

Այսինքն, դա Ռուսաստանի աստիճանական դուրս մղումն է Անդրկովկասից։ Եվ այդ առաջադրանքի իրականացման տեխնոլոգներից մեկը Փաշինյանն է։ Որպես ոչ ինքնուրույն անհատ՝ նա հետևողականորեն, քայլ առ քայլ կատարում է իր առաջադրանքը։ Նա ուներ մի իրավիճակ, երբ նրան անհրաժեշտ էր վերընտրվել երկրորդ ժամկետով ու, ըստ այդմ, շահագրգռված էր Ռուսաստանի աջակցությամբ, և այդ ժամանակ նա գործեց ամբողջովին ճիզվիտական տրամաբանության ոգով, սողաց Պուտինի մոտ, աղաչեց աջակցել իրեն, քանզի հասկանում էր, որ առանց Ռուսաստանի աջակցության չէր վերընտրվի, խոստացավ, պայմանների ցուցակ ստացավ, վերցրեց, արյունով ստորագրեց ու հետո հետ սողաց։

Արդյունքում նա ընտրվեց երկրորդ ժամկետով, որից հետո ճմրթեց, պատռեց ու նետեց այդ ցուցակը: «Ինձ ոչինչ չի հետաքրքրում: Ես գլոբալիստական վերնախավի ներկայացուցիչ եմ, եթե քեզ ինչ-որ բան դուր չի գալիս, դիմիր սատանային, այսինքն՝ Սորոսին՝ իմ տիրոջը»,– սա է նրա ամբողջ խոսակցությունը: Սա բացարձակ անգլո-սաքսոնական տրամաբանություն է, ըստ որի, եթե սուտը բերում է հաջողության, ապա այն պետք է օգտագործվի։ Անգլո-սաքսոնների համար ստելը միշտ էլ տեխնոլոգիական առավելություն է եղել։ Հենց այդպես էլ գործում է Փաշինյանը:

Մանրամասները՝ «Փաստ» օրաթերթի այսօրվա համարում