Մշակույթի նախարարությունը կնշի՞ Ռաիսա Մկրտչյանի 75-ամյակը
ՄՇԱԿՈՒՅԹՍիրված երգչուհի,ՀՀ ժողովրդական արտիստուհի Ռաիսա Մկրտչյանը երեկ նշեց իր հոբելյանը՝ 75 ամյակը:
Past.am-ի թղթակցին մեծանուն երգչուհին պատմեց, որ առանձնապես անակնկալներ չեն եղել, հավաքվել են ընտանիքի անդամներով, հիշել են անցյալի դրվագներ, փորձել են ուրախանալ:
«Չեմ ընդունում տարիքս, հոգով ինձ երիտասարդ եմ զգում»,- ժպիտով նշեց մեր զրուցակիցը:
Մեր հարցին՝ հոբելյանական համերգներ նախատեսվա՞ծ են, տիկին Մկրտչյանը պատասխանեց.
«Դա պետք է նախատեսի Մշակույթի նախարարությունը, քանի որ մեծ գումարների հետ է կապված: Պետք է դահլիճ և երաժիշտներ վարձել, մեծածավալ աշխատանք է: Գուցե նման առաջարկներ լինեն: 70-ամյակիս հոբելյանական համերգի նախապատրաստական աշխատանքներն ամիսներ շարունակ էին ընթանում: Հնարավոր է, որ լինի համերգ, հնարավոր է՝ ոչ»:
Ռաիսա Մկրտչյանը հայտնեց, որ ունի հետաքրքիր հյուրախաղերի երկու առաջարկ, սակայն չնշեց, թե որ երկիր: Ժողովրդական արտիստուհու խոսքերով՝ զբաղվածությունը շատ է, հպարտ է նաև իր ուսանողներով:
«Հիմա շատ լավ երեխաներ կան, լավ պոտենցիալ ունեն, բայց չկան լավ երգեր, որոնք մտնեն մարդկանց հոգիները: Ժամանակի մեր բոլոր լավագույն երգերը գրվում էին արհեստավարժ կոմպոզիտորների, պոետների կողմից, հիանալի, երաժիշտներ, գործիքավորողներ ունեինք: Այն տարիների աշխատանքները ես համարում եմ շատ ավելի նշանակալից: Այսօրվա բազմաթիվ երգեր թիթեռի կյանք ունեն, բայց կան անհատներ, որոնց գործերը մնայուն են: Չի կարելի ամեն ինչ մերժել: Բայց այսօր երգերի թեմաներն ու մատուցումը նույնն է, կատարողների ձայնային տեմբրը միանման է: Հաճախ չես կարողանում հասկանալ՝ որ երգիչն է: Երգիչները պետք է ունենան իրենց անհատական ոճն ու ձեռագիրը»,- ընդգծեց Ռ. Մկրտչյանը:
Սիրված արվեստագերը չառանձնացրեց իր համար շրջադարձային երգ:
«Համագործակցել եմ Առնա Բաբաջանյանի, Ալեքսեյ Հեքիմյանի,Ռոբերտ Ամիրխանյանի, Մելիք Մավիսակալյանի, Էդուարդ Բաղդասարյանի, Ալեքսանդր Աճեմյանի, Մարտին Վարդազարյանի և այլ մեծանուն կոմպոզիտորների հետ: Շատ բարձր մակարդակի վրա էր գտնվում հայկական երգարվեստը: Կային երգեր, որոնք չէին զիջում միջազգային չափանիշներին»,- ասաց նա:
Վերջում Ռաիսա Մկրտչյանը շեշտեց՝ իր համար ժողովրդի սերը մեծագույն ձեռքբերում է, նա մշտապես զգացել է մարդկանց ջերմությունը և ուրախ է, որ իր հոգու գործը կարողացել է հասցնել որոշակի մաքսիմումի:
Լևոն Փանոսյան