«Եթե նորից առաջարկ ստանամ, չեմ գնա «X Factor»». Շուշանիկ Արևշատյանը՝ նախագծի վերջնարդյունքի մասին
ԼԱՅՖԵրեկ կայացավ «X Factor» նախագծի 4-րդ եթերաշրջանի եզրափակիչ գալա համերգը: Պրոդյուսերներից 3-ը՝ Գարիկ Պապոյանը, Էրիկը և Անդրեն մեկական ֆինալիստ ունեին, և հաղթողի տիտղոսը բաժին հասավ տղաների խմբից Էդգար Ղանդիլյանին:
Թեև նախագծի հենց սկզբից նշվում էր, որ այս տարի ամենաուժեղը մեծահասակների խումբն է, Շուշանիկ Արևշատյանը եզրափակչում մասնակից չունեցավ:
Past.am-ը որոշեց զրուցել «Ռադիո Վան»-ի տնօրենի հետ՝ իմանալու նրա կարծիքը նախագծի վերջնական արդյունքի մասին.
«Այսպիսին է «X Factor»-ը, արդարի ու անարդարի խնդիր չկա: Ժյուրիից ոչինչ կախված չէ, ամեն ինչ միայն հանդիսատեսն է որոշում: Եթե հեռուստադիտողը քվեարկում է մասնակցին, ուրեմն նա արժանի է, իսկ հանդիսատեսն էլ արժանի է այդ մասնակցին, ավել բան չեմ կարող ասել»:
Հարցին, թե միգուցե քվեարկության կարգի մեջ պետք է փոփոխություն կատարել, որ հաղթողն ընտրվի պրոֆեսիոնալ մասնագետների կողմից, այլ ոչ թե հայկական խնամի-ծանոթ-բարեկամ տարբերակով, Արևշատյանը պատասխանեց.
«Ոչ մի բան չի կարող փոխվել. սա խաղ է, որն ունի իր կանոնները: Այդ օրենքները մենք չենք հնարել, խաղը Լոնդոնում են ստեղծել: Բայց աշխարհում այնքան կարևոր բաներ կան, որ պետք չէ այդքան լուրջ ընդունել այս ամենը: Թեթև տարեք, սա ուղղակի խաղ է, էլի եմ կրկնում»:
Մենք հետաքրքրվեցինք նաև, թե առաջարկ ստանալու դեպքում Շուշանիկ Արևշատյանը նորից կհամաձայնի՞ ստանձնել խմբերից մեկի ղեկավարի պաշտոնը.
«Ոչ, չեմ գա, որովհետև շատ ժամանակատար նախագիծ է, իսկ ես աշխատանքիս հետ չեմ հասցնում: Եթե ուզում ես, որ ամեն ինչ լավ լինի, պետք է շատ ժամանակ հատկացնես, ինչը ես, ցավոք, չունեմ: Եթե չաշխատեի, կհամաձայնեի»:
Մարիամ Նալբանդյան