Հոր ձայնն օգնեց
ՎԵՐԼՈՒԾԱԿԱՆՀՀ նախագահ Սերժ Սարգսյանը հրամանագիր է ստորագրել, որով Նարա Շլեպչյանը եւ Մերուժան Տեր-Գուլանյանը նշանակվել են Հանրային հեռուստառադիոընկերության խորհրդի անդամներ։ Հանձնաժողովը ներկայացված հինգ թեկնածուներից ընտրել է հենց այս երկուսին։ Հանձնաժողովը հիմք է ընդունել հեռուստատեսությունում Նարա Շլեպչյանի եւ Մերուժան Տեր-Գուլանյանի երկարամյա աշխատանքային փորձը, զգալի ներդրումը, լրագրության ոլորտի զարգացման գործում ունեցած ակնառու հաջողություններն ու ձեռքբերումները, ինչպես նաեւ հասարակության լայն շրջանում ունեցած հեղինակությունն ու վստահությունը:
Եթե Նարա Շլեպչյանի պարագան հասկանալի էր, ապա Տեր-Գուլանյանի դեպքում, մեղմ ասած, հանձնաժողովի հիմնավորումն այդքան էլ տեղին չէ։ Սխալ է խոսել այս անձնավորության հասարակական դիրքի մասին։ Իսկ քաղաքացիներին հարցրե՞լ են, թե նրա հասարակական դիրքը ինչումն է կայանում։ Կամ ինչպես են վերաբերվում քաղաքացիներն այն «մտավորականին», ով սազը ձեռքին, ամբողջ օրը գովում է գործող իշխանությանը։ Ինչպես տեսնում ենք, շողոքորթությունն ու քծնանքը արդյունք տվեցին։
Հիշեցնենք, որ անգամ Տեր-Գուլանյանի հայրն էր Ջավախքից եկել հանրապետականին քվեարկելու համար։ Իսկ այս մտքի կաճառ մտավորականը, որը հռչակված է հայկական մշակույթի ռահվիրաներից մեկը, անգամ տեղյակ չէր, թե իր ընտրած քաղաքական ուժի ծրագրում մշակույթի վերաբերյալ հատված կա, թե ոչ։ Մեզ մնում է մաղթել բարի վայելում։ Մատուցած ծառայություններն աննկատ չմնացին։
Սմբատ Վարդանյան, Armenia24.info