Թուրքական արտադրանքն ու հայկական շուկան
ՎԵՐԼՈՒԾԱԿԱՆՇատ են գրում ու խոսում այն մասին, որ անհրաժեշտ է հրաժարվել Թուրքիայում արտադրված ապրանքներից, բայց գրեթե չի նշվում՝ որոնք են այդ ապրանքները: Ստորև ձեզ ենք ներկայացնում թուրքական արտադրության մի քանի բրենդներ, որոնք շատ են գովազդվում ու սպառվում հայաստանյան միջավայրում: Նպատակը շարքային ընթերցողին ու գնորդին պարզապես այդ ապրանքների անվանումները հաղորդելն է, իսկ գնել, թե ոչ, յուրաքանչյուր մարդու որոշելիքն է:
Քոչ հոլդինգը, Թուրքիայում ամենամեծ հոլդինգն է: Նրան է պատկանում կենցաղային տեխնիկա արտադրող ու Հայաստանում պարբերաբար գովազդվող BEKO ապրանքանիշը:
Էվյափ հոլդինգը մասնագիտացված է հիգիենայի պարագաներ արտադրելու գործում: Այս հոլդինգի արտադրանքի մի քանի տեսակների ևս կարելի է հանդիպել հայկական շուկայում` FAX և DURU օճառներ, ARKO լոգանքի գելեր տղամարդկանց համար:
Հայաթ հոլդինգը մասնագիտացված է տան մաքրության, անձնական հիգիենայի պարագաների արտադրության ոլորտում: Հոլդինգին պատկանող ապրանքները հայտնի են նաև հայկական շուկայում ̀ Molped հիգիենիկ միջադիր, Bingo լվացքի փոշի, Molfix մանկական տակդիր, Papia զուգարանի թուղթ:
ABC deterjan արդյունաբերական և առևտրային կազմակերպությունը չունի հոլդինգի կարգավիճակ: Սակայն էական է այն, որ դրա ապրանքները ևս տեղ ունեն հայկական շուկայում` ABC և ALFA լվացքի փոշիների/հեղուկների տեսքով:
Երևանը հեղեղված է LC WAIKIKI խանութների ցանցով և դրա ապրանքներով: Այն պատկանում է Թահա հոլդինգին, որը ստեղծվել է 1988 թվականին:
Arian քիմիական առևտրային և արդյունաբերական կազմակերպության բրենդներից Հայաստանում հայտնի են Ave և Home Plus ապրանքանիշերը:
Սա բնականաբար ամբողջական ցանկ չէ: Այստեղ պարզապես նշված են Հայաստանում լայն տարածում ստացած պարագաներ:
Աիդա Գրիգորյան, Armenia24.info