Ճշտի մոհիկանները
ՎԵՐԼՈՒԾԱԿԱՆՓաստաբանների պալատը մեկ անգամ չէ, որ հայտնվում է սկանդալների կիզակետում: Անգամ անտեղյակ մարդը, ով չգիտի ներսի խոհանոցը, մամուլի հրապարակումներից միայն կարող է պատկերացում կազմել, թե ինչ է կատարվում այդ կառույցում ̀ միջանձնային և խմբային հարթությունների վրա: Հրապարակային փոխադարձ հայհոյանքները, վեճերը, բանսարկությունները, վիրավորանքները դարձել են մի զգալի խմբի կենսաձև: Այնինչ, ենթադրվում է, որ հասարակական հարաբերություններում և հայեցակարգում, փաստաբանները պետք է մաս կազմեն ինտելեկտուալ էլիտայի: Ենթադրվում է, որ նրանք ուսյալ և կիրթ մարդիկ են, որոնք ինչ-որ առումով պետք է դրական ազդեն այդ նույն հասարակության ինտելեկտուալ արժեքների ձևավորման վրա:
Բայց արի ու տես, որ տեղի է ունենում ճիշտ հակառակը: Խոսքն իհարկե բոլորին չի վերաբերվում: Ինչպես շատ ոլորտներում, այստեղ ևս կան բարեխիղճ անձիք: Մեր քննարկման թեման այն խումբն էր, որ փողոցային, քուչի մշակույթը բերել է դաշտ: Այս դեպքում, անգամ անուններն էական չեն: Էական է այն հանգամանքը, որ իրավական հարաբերությունների և դրանց կարգավորման ներկայացուցիչները միմյանց հետ <<ճշտով բազառ>> են անում, ավելին ̀ դիմում են բռնության, որը որևէ կերպ արդարացված չէ: Եվ դա դեռ քիչ է, այդ ամենը դառնում է հանրության սեփականությունը և քննարկման առարկան: Սա ի՞նչ է, ուղղակի ազդեցություն նրանց հաճախորդներից: Թերևս այլ բնութագրում չենք կարող տալ: Դասականը ճշմարիտ էր, երբ այս պետությունն անվանում էր խուժանապետություն:
Անուշ Հարությունյան, Armenia24.info