«Ելք»-ի պրովակացիան
ՎԵՐԼՈՒԾԱԿԱՆ«Լուսավոր Հայաստան» կուսակցությունը, որ մաս է կազմում «Ելք» դաշինքի, պատրաստվում է դիմել Սահմանադրական դատարան, կապված Վանաձորի ավագանու նիստերի և մանդատների բաշխման հարցով։ Վանաձորյան հայտնի ոդիսականը բոլորս գիտենք։ Այն դեռ չի ավարտվում և խմորը շատ ջուր է ուզում։ «Լուսավոր Հայաստանը» մեկ անգամ չէ, որ հայտնել է Սահմանադրական դատարան դիմելու իր ցանկության մասին։ Սակայն տարօրինակ է այն, որ նրանք հիմա են դա փորձում անել։ Այստեղ կա հետաքրքրական մոտիվացիա։ «Ելքից» բացի, անհրաժեշտ է «Ծառուկյան» դաշինքի ստորագրությունները ևս, որը հնարավորություն կտա դիմել դատարան։ Նախորդ գումարման Ազգային ժողովում, նրանք շատ հանգիստ կարող էին դա կազմակերպել և հասնել արդյունքի։ Սակայն թողել են հիմա։ Եվ ինչու՞։ Բնական է, որ կլինեն մարդիկ, ովքեր չեն ստորագրի այդ նախաձեռնության տակ։ Սա հիմնավորում կտա «Ելքին» երևալ «միակ» ընդդիմադիր ու հարվածել «Ծառուկյան» դաշինքին հենց այդ դաշտում։
«Ելքի» նման գործելաոճը նորություն չէ։ Նրանք թողած իշխանությանը, որի հիմնական ընդդիմախոսները պետք է լինեին, հարվածում են ընդդիմադիր դաշտի մյուս ուժերին։ Մի տեսակ ստացվել է, որ դաշինքի առաջատար դեմքերից ոմանք, տառապում են «միակի» ձգտումով։ Այդպես նրանք վարվեցին ամբողջ քարոզարշավի ընթացքում, երբ թողած իշխանությանը, հարվածում էին ՀԱԿ-ին և «Ծառուկյան դաշինքին»։ Նույն կերպ են նրանք հիմա վարվում քաղաքապետի ընտրություններում, թողած իրենց հիմնական մրցակից Տարոն Մարգարյանին, նրանք հարվածում են Զարուհի Փոստանջյանին։ Չնայած ո՞վ գիտի, միգուց նրանց հիմնական մրցակիցը հենց Զարուհին է։
Ատոմ Ոսկանյան, Armenia24.info