«Միսս ԱՊՀ» միջազգային գեղեցկության մրցույթի մասնակիցներին ու հյուրերին կդիմավորեն Գյումրիում
ՄՇԱԿՈՒՅԹ«Միսս ԱՊՀ» միջազգային գեղեցկության մրցույթի մասնակիցներն ու հատուկ միջոցառմանը ներկա գտնվելու և լուսաբանելու համար Հայաստան ժամանող հյուրերը մեր երկիր կժամանեն մայիսի 25-ին:
«Արմենպրես»-ի հաղորդմամբ`Գյումրիի «Շիրակ» օդանավակայանում, Գյումրու քաղաքապետարանի աջակցությամբ, նախատեսվում է կազմակերպել հյուրերին պատշաճ դիմավորելու հանդիսավոր արարողություն: Հյուրերը կշրջեն Հայաստանի տեսարժան վայրերով:
Երևանում հունիսի 6-ին «Փարավոն» ժամանցի համալիրում կկայանա «Միսս ԱՊՀ» միջազգային գեղեցկության մրցույթի եզրափակիչ փուլը: «Միսս ԱՊՀ-2017» մրցույթի եզրափակչին մասնակցելու համար Հայաստան կժամանեն ԱՊՀ անդամ երկրների 18-25 տարեկան 20-25 գեղեցկուհիներ, ովքեր հաղթել են իրենց երկրներում կայացած ընտրական մրցույթներում։
«Միսս ԱՊՀ» միջազգային գեղեցկության մրցույթը նոր մասշտաբային ծրագիր է, որը կազմակերպել են երեք բրենդային կազմակերպություններ՝ «Топ модель России» և «Российская красавица» համառուսական մրցույթների կազմակերպիչ «Ալեքս Գրուպ» ՍՊԸ պրոդյուսերական կենտրոնը (Մոսկվա, գլխավոր տնօրեն՝ Ալեքսանդր Աբդուլիմով), «NAIRI TRAVEL» տուրիստական գործակալությունը (Երևան, տնօրեն՝ Նաիրի Մնացականյան) և Կրեատոր Անապա-Փարիզ պրոդյուսերական կենտրոնը (գլխավոր տնօրեն՝ Արթուր Հովհաննիսյան)։
«Միսս ԱՊՀ-2017»-ի եզրափակիչի ժյուրիի կազմում ընդգրկված են ոլորտի 11 փորձառու մասնագետներ՝ 3-ը` Հայաստանից, 4-ը՝ Ռուսաստանից և 4-ը՝ ԱՊՀ անդամ այլ երկրներից։
«Միսս ԱՊՀ-2017» գեղեցկության մրցույթին մասնակցում են 13 երկիր: Այն ընդգրկում է 25-միլիոնանոց լսարան: Մրցանակային ֆոնդը կազմում է 16,2 մլն ՀՀ դրամ:
Միջոցառման աջակիցների թվում են ԱՊՀ միջպետական կոմիտեն, ՀՀ տնտեսական զարգացման և ներդրումների նախարարությունը, Երևանի քաղաքապետարանը: