«Երկիր ծիրանի»-ն անվստահություն է հայտնել Երևանի ավագանու իր երկու անդամներին
ՔԱՂԱՔԱԿԱՆ«Երկիր ծիրանի» կուսակցությունն անվստահություն է հայտնել Երևանի ավագանիում կուսակցության խմբակցության երկու անդամների: Այս մասին հայտարարություն է տարածել «Երկիրծիրանի» կուսակցությունը:
«Սույն թվականի հունիսի 18-ին Երևանի ավագանու «Երկիր Ծիրանի» խմբակցության անդամները անցկացրել են նիստ, որին մասնակցում էին խմբակցության ղեկավար Զարուհի Փոստանջյանը, քարտուղար Մարինա Խաչատրյանը և անդամ Սոնա Աղեկյանը: Նիստի օրակարգում ընդգրկված էին Հայկ Պետրոսյանին և Մնացական Պարակշիևին անվստահություն հայտնելու և նրանց Երևանի ավագանու մշտական հանձնաժողովներից հետ կանչելու հարցերը:
Անվստահության հիմք է ընդունվել Հայկ Պետրոսյանի և Մնացական Պարակշիևի կողմից կուսակցության գաղափարախոսությանը, ծրագրերին և սկզբունքներին դավաճանելը, ինչպես նաև երևանցու գերակա շահը անձնական շահերին ստորադասելու փաստը», - ասված է «Երկիր Ծիրանի» խմբակցության լրատվական ծառայության տարածած հաղորդագրությունում:
«Արմենպրես»-ի հետ զրույցում ՀՀ ԿԸՀ մամուլի խոսնակ Հերմինե Հարությունյանը նշեց, որ ԿԸՀ-ն դեռևս Երևանի ավագանու «Երկիր ծիրանի» խմբակցության անդամներ Հայկ Պետրոսյանից և Մնացական Պարակշիևից մանդատները վայր դնելու մասին դիմումներ չի ստացել: «Այս պահին նման դիմումներ Կենտրոնական ընտրական հանձնաժողով չեն մուտքագրվել»,- ասաց Հարությունյանը: