Գործարարների շահերի պաշտպանության խնդիր կա. տնտեսագետը՝ կառավարության նախաձեռնության մասին
ՀԱՍԱՐԱԿՈՒԹՅՈՒՆԱյն դեպքում, երբ դատական համակարգը սկսում է իր ֆունկցիաները կատարելու տեսանկյունից թերանալ, ուրեմն միջնորդ օմբուդսմենների, հաշտարարների և այլ կարգավորող օրենքների անհրաժեշտություն է սկսում առաջանալ:
Այս մասին Tert.am-ի հետ զրույցում ասաց տնտեսագետ Վիլեն Խաչատրյանը` անդրադառնալով գործարար միջավայրի բարելավման և բիզնեսի շահերի պաշտպանության վերաբերյալ ՀՀ կառավարության ծրագրին, համաձայն որի՝ նախատեսվում է մինչև 2017 թվականի ավարտը մշակել «Գործարարների շահերի պաշտպանի մասին» ՀՀ օրենքի նախագիծ և այն ներկայացնել ՀՀ Ազգային ժողով:
«Բացի այն, որ դատական համակարգը սկսում է իր ֆունկցիաները կատարելու տեսանկյունից թերանալ, նաև մշակվում և փոփոխվում են մի շարք օրենքներ, այդ օրենքների հետ կապված սկսում են թրեյնինգներ անել, խորհրդատվական ծառայություններ մատուցել:Երբ նայում ես այդ ամբողջ շղթային, նկատում ես, որ գործարարների շահերի պաշտպանի մասին օրենքներն անհրաժեշտ են, որ գործարարը խուսափի դատական համակարգի հետ առնչվելուց»,-ասաց տնտեսագետը:
Նրա խոսքով՝այդ ամենի միջնորդ օղակը, որպես այդպիսին, բիզնես օմբուդսմենի գաղափարն է, որպեսզի տվյալ օղակի միջոցով իր խնդիրներն ու հարցը լուծի:
«Չեմ կարծում, որ միայն այդ օրենքի բացակայությամբ է պայմանավորված մեր բիզնես միջավայրի վատ վիճակում լինելը, բայց, այնուամենայնիվ, գործարարների շահերի պաշտպանության խնդիր գոյություն ունի, օրենքների մեջ կան տարընթերցումներ, ձևակերպումներ,որ միանշանակ չեն ընկալվում հարցերը»,-ասաց Խաչատրյանը, հավելելով, որ նման հարցերի մեկնաբանության ժամանակ նման մարմինների կամ նման շահերի պաշտպանության անհրաժեշտություն լինում է:
Նշենք, որ Գործարար միջավայրի բարելավման և բիզնեսի շահերի պաշտպանության ոլորտում ՀՀ կառավարությունը նախատեսում է մինչև 2017 թվականի ավարտը մշակել «Գործարարների շահերի պաշտպանի մասին» ՀՀ օրենքի նախագիծ և այն ներկայացնել ՀՀ Ազգային ժողով ու մինչև 2018 թվականի ավարտը՝ որպես գործարարների խախտված կամ վիճարկվող իրավունքների և օրինական շահերի պաշտպանության և վեճերի լուծման այլընտրանքային արդյունավետ միջոց ներդնել՝ գործարարների շահերի պաշտպանի ինստիտուտ: