Գեղարքունիքի դատարանի նախկին նախագահը հրաժարվում է մասնակցել քննչական գործողությունների
ՀԱՍԱՐԱԿՈՒԹՅՈՒՆԱռանձնապես խոշոր չափերի կաշառք վերցնելու մեջ մեղադրվող Գեղարքունիքի մարզի ընդհանուր իրավասության դատարանի արդեն նախկին նախագահ Աղվան Պետրոսյանի մասնակցությամբ քննչական գործողություններ չեն եղել: Այս մասին այսօր՝ հունիսի 20-ին, NEWS.am-ի հետ զրույցում ասաց նրա շահերի պաշտպան Արմեն Մելքոնյանը: Նա նշեց, որ իր պաշտպանյալն հրաժարվում է մասնակցել որեւէ քննչական գործողության:
Պաշտպանի խոսքով, «Նաիրի» բժշկական կենտրոնից միանգամից կալանավայր տեղափոխված նախկին դատավորի առողջական վիճակը լավ չէ, նա անընդհատ բուժօգնություն է ստնում «Վարդաշեն» ՔԿՀ-ի բուժանձնակազմի կողմից: Արմեն Մելքոնյանը մեզ հետ զրույցում նշել էր, որ իր պաշտպանյալն ունի լուրջ հիվանդություններ. «Ողնաշարի ճողվածք, շաքարային դիաբետ, զոբ եւ վերջին դեպքերի հետ ապված կաթված է տարել եւ այս ամենով հանդերձ նրան հիվանդանոցից հրատապ դուրս են գրել եւ կալանավորել»:
Աղվան Պետրոսյանը չի ընդունում իրեն առաջադրված մեղադրանքները:
Հիշեցնենք, որ այս գործը կապված է տարիներ առաջ՝ 2014-ին կալանավորված անչափահաս Գոռ Գալստյանի հետ։ 2014 թվականի հուլիսի 25-ին Վարդենիսում զենքի գործադրմամբ կատարված խուլիգանության եւ դանակահարության փաստի առթիվ քննվող քրեական գործով մեղադրյալ Գ.Գ.-ի արարքը որպես ինքնապաշտպանություն որակելուն նպաստելու համար Սեւակ Շհոյանը մեղադրյալի ծնողներից 2015 թվականի հունիսին պահանջել և ստացել է առանձնապես խոշոր չափերով` 1.880.000 դրամին համարժեք 4000 դոլար կաշառք: Սակայն գումարը ստանալուց հետո դատախազը խոստումը չի կատարել, եւ Գ.Գ.-ն 2015 թվականի հուլիսի 1-ին կալանավորվել է:
Հավաքված բավարար ապացույցների համակցության հիման վրա դատախազին մեղադրանք է առաջադրվել ՀՀ քրեական օրենսգրքի 311-րդ հոդվածի 4-րդ մասի 2-րդ կետով` մեղադրյալի օգտին գործողություն կատարելու համար նրա ծնողներից առանձնապես խոշոր չափերով կաշառք պահանջելու եւ ստանալու համար:
Հատուկ քննչական ծառայության քննիչը միջնորդություն է ներկայացրել Երեւանի Արաբկիր եւ Քանաքեռ-Զեյթուն վարչական շրջանների ընդհանուր իրավասության առաջին ատյանի դատարան` Սեւակ Շհոյանի նկատմամբ կալանավորումը որպես խափանման միջոց կիրառելու վերաբերյալ: Դատարանի կողմից միջնորդությունը բավարարվել է, դատախազը կալանավորվել է: Նույն գործի շրջանակում մեղադրվում են նաեւ Աղվան Պետրոսյանը եւ նույն դատարանի դատավոր Վանիկ Վարդանյանը: