«Լիդիան Արմենիա» ընկերության արագ արձագանքման խմբի մասնակիցներին ԱԻ նախարարության կողմից հավաստագրեր հանձնվեցին
ՀԱՍԱՐԱԿՈՒԹՅՈՒՆ ՀՀ ԱԻ նախարարությունը «Լիդիան Արմենիա» ընկերության արագ արձագանքման խմբի անդամներին սերտիֆիկատներ հանձնեց։
«Արմենպրես»-ի հաղորդմամբ՝ ՀՀ արտակարգ իրավիճակների նախարարությունը 20-օրյա դասընթաց է անցկացրել «Լիդիան Արմենիա» ընկերության 11 աշխատակիցների համար՝ ձևավորելով արագ արձագանքման խումբ։
Խումբը ստեղծվել է անմիջականորեն հանքի տարածքում՝ առայժմ շինարարության, ապագայում նաև արդյունահանման ընթացքում պրոֆեսիոնալ մակարդակով արտակարգ իրավիճակները կանխարգելելու և կառավարելու նպատակով։
«Լիդիան Արմենիա» ընկերության անվտանգության բաժնիանվտանգության մոնիտոր Ջերմուկ համայնքի Գնդևազ գյուղի բնակիչԼևոն Հովհաննիսյանը նշեց, որ արդեն հինգ ամիս է, ինչ աշխատում է այստեղ։
«Այս դասընթացը մեզ մի շարք գիտելիքներ տվեց անվտանգության բնագավառում։ Պատահարների դեպքում մենք կարող ենք շատ արագ արձագանքել՝ մինչև ԱԻՆ-ը հասնի։ Պրակտիկ փորձեր ենք ունեցել, սովորել ենք՝ ինչպես հրդեհի ժամանակ տուժածներին դուրս բերել, ինչպես աշխատել հիդրավլիկ գործիքներով և կրակմարիչներով։ Եռօրյա առաջին բուժօգնության դասեր ենք ունեցել, որոնց ժամանակ գիտելիքներ ենք ստացել, որպեսզի իմանանք, թե ինչպես տուժածի կյանքը փրկենք՝ մինչ շտապօգնության ժամանումը»,- ասաց ընկերության աշխատակիցը։
Մասնակիցներին հավաստագրեր հանձնեց ՀՀ ԱԻ փոխնախարար ԷնրիկոԱպրիամովը, ինչից հետո շնորհավորեց բոլորին դասընթացին ակտիվ մասնակցելու համար։
«ՀՀ ԱԻ նախարարության և «Լիդիան Արմենիա» ընկերության համագործակցության արդյունքում այսօր ունենք արտակարգ իրավիճակներում պատրաստված մասնագետներ: Վստահ ենք, որ այդ ընթացքում ձեռք բերված գիտելիքները կկիրառվեն ըստ անհրաժեշտության»,- ասաց Ապրիամովը:
Արտակարգ իրավիճակների նախարարության կողմից շնորհակալագիր հանձնվեց նաև «Լիդիան Արմենիա»-ի գործադիր տնօրեն Հայկ Ալոյանին՝ ընկերության գործունեության ապահով և անվտանգ պայմանների ստեղծման ուղղությամբ գործադրվող ջանքերի համար։
Նրա համար նախատեսված շնորհակալագիրը ՀՀ ԱԻՆ աշխատակազմի ղեկավար Գագիկ Հայրապետյանը փոխանցեց կայուն զարգացման գծով ավագ մենեջեր Արմեն Ստեփանյանին, ով լրագրողների հետ զրույցում ասաց, որ մարդկանց չես կարող պարտադրել, որպեսզի անվտանգության նկատառումներից ելնելով սաղավարտ կրեն, այլ պետք է բացատրես։
«Մենք տարիներ հետո արդեն տեսնում ենք արդյունքը մեր կատարած աշխատանքների։ Մեր համայնքի ժողովուրդն այսօր արդեն ինքն է այդ արժեքները կրողը։ Անցնելով այս դասընթացները՝ ընկերության աշխատակիցներն ավելի անվտանգ կդարձնեն հանքում աշխատանքը»,- նշեց Ստեփանյանը։
ՀՀ ԱԻՆ «Աղետների բժշկության կենտրոն» ՊՈԱԿ տնօրեն, փրկարար ծառայության գնդապետ Կարեն Աթոյանը շեշտեց, որ համագործակցությունը «Լիդիան Արմենիա»-ի հետ արդեն շարունակական բնույթ է կրում։
«Մենք համագործակցում ենք ընկերության հետ և, դասընթացներ անցկացնելով, պատրաստել ենք արագ արձագանքման թիմ«Լիդիան Արմենիա»-ի այդ խումբը համագործակցում է ԱԻՆ տարածքային թիմերի՝ Ջերմուկի, Վայքի և Եղեգնաձորի հրշեջ-փրկարարական ջոկատների հետ։ Շատ եմ կարևորում այս ընկերության գործունեությունը»,- ասաց Աթոյանը։ Վերապատրաստված խումբը անհրաժեշտության դեպքում կարող է նաև աշխատել ՀՀ ԱԻՆ համայնքային ստորաբաժանումների հետ՝ որպես արտակարգ իրավիճակների կառավարման օժանդակ կարողություն։
Արտակարգ իրավիճակների կառավարման հմտությունների ձեռքբերման նպատակով ավելի վաղ վերապատրաստվել է նաև հանքի տարածքում բժշկական շուրջօրյա հերթապահություն իրականացնող 11 մասնագետներից բաղկացած բժիշկների խումբը։