Բաբկեն Ենգիբարյան. «Հայաստանի փոքրությունն ու մասնագետների կոնցենտրացիան լուրջ առավելություն է տալիս ինժեներական ոլորտում». «Փաստ»
ՀԱՐՑԱԶՐՈՒՅՑ«Փաստ» օրաթերթը գրում է.
ՀՀ տնտեսական զարգացման և ներդրումների նախարարությունում օրեր առաջ տեղի է ունեցել աշխատանքային հանդիպում, որին մասնակցել են նախարարի տեղակալ Էմիլ Տարասյանը, Ձեռնարկությունների ինկուբատոր հիմնադրամի տնօրեն Բագրատ Ենգիբարյանը, «Նեյշնլ Ինսթրումենթս» ընկերության վաճառքի և մարքեթինգի գծով ավագ փոխնախագահ Ֆրենսիս Գրիֆիթսը, Եվրոպայի, Մերձավոր Արևելքի, Հնդկաստանի և Աֆրիկայի երկրներում «Նեյշնլ Ինսթրումենթս» ընկերության վաճառքի և մարքեթինգի գծով փոխնախագահ Ռոբերտ Մորթոնը, «Նեյշնլ Ինսթրումենթս ԷյԷմ»–ի տնօրեն Արամ Սալաթյանը:
Հանդիպման ժամանակ նշվել է, որ ներկայում իրականացվում են Ջրվեժում ինժեներական քաղաքի հիմնման աշխատանքները, և նշված ծրագրում ևս կառավարությունը կարևորում է «Նեյշնլ Ինսթրումենթս» ընկերության հետ փոխշահավետ համագործակցությունը:
Ձեռնարկությունների ինկուբատոր հիմնադրամի տնօրեն Բագրատ Ենգիբարյանը «Փաստի» հետ զրույցում նշեց, որ «Նեյշնլ Ինսթրումենթս» ընկերությունը շատ բարձր է գնահատում համագործակցությունը Հայաստանի հետ:
– Այն ուղղակի կազմակերպություն չէ, այլ համակարգաստեղծ կազմակերպություն է: Մեզ մոտ առկա ազգային–ինժեներական լաբորատորիաներն էլ լրջորեն խթանում են ճարտարագիտության ոլորտի զարգացմանը Հայաստանում:
Նախևառաջ ասեմ, որ «Նեյշնլ Ինսթրումենթս» հանդիսանում է Ջրվեժում մեր ինժեներական քաղաքի հիմնական ռազմավարական գործընկերը: Իրենք շատ ուրախ էին, որ Հայաստանի կառավարությունը նման նախաձեռնություն ունի և հանդիպման ժամանակ նաև քննարկվեց, թե ինչպիսի պլաններ կան քաղաքը արագ սկսելու, ավելի շատ կրթական ոլորտի զարգացման ծրագրեր իրականացնելու համար:
«Նեյշնլ Ինսթրումենթս»–ի ներկայացուցիչները նաև ընդգծեցին, որ բարձր են գնահատում Հայաստանի ներուժը: Գիտեք, որ աշխարհի 5 մեծ գիտահետազոտական կենտրոններից մեկը Հայաստանում է, և նրանք նաև մոտակա ապագայում կհայտարարեն, որ ընդլայնում են գործունեությունը Հայաստանում:
Ջրվեժի ինժեներական քաղաքում տեղակայված է լինելու մոտ 30 շենք, ուր ամեն կազմակերպություն իր շենքն է ունենալու: Մեկ շենք ունի «Նեյշնլ Ինսթրումենթս»–ը, որտեղ բացի իրենցից տեղակայված կլինեն նաև ուսումնական–կրթական լաբորատորիաներ: Քաղաքում կպատրաստվի նաև մեկ ինկուբատոր, ուր նորաստեղծ ընկերությունների համար հնարավորություն կստեղծվի տեղակայվելու:
Քաղաքում արդեն իսկ տեղակայված են տիեզերքի ու տեխնոլոգիաների թանգարանները: Թանգարանի և «Նեյշնլ Ինսթրումենթս»–ի շենքերն արդեն պատրաստ են, վերջինն արդեն կարող է տեղափոխվել: Մնացել է, որ այլ կազմակերպություններին հնարավորություն տանք իրենց հատկացված հողի վրա շինարարությունը սկսեն: Կարծում եմ, որ մինչև տարեվերջ այդ գործընթացները կսկսվեն:
– Մենք այնտեղ աշխատող մասնագետների պակաս չե՞նք ունենա:
– Երկու օր առաջ Վանաձորի Տեխնոլոգիական կենտրոնում մեծ ինժեներական ֆորում–ցուցահանդես էր: Եվ այն, ինչ տեսանք, զարմացրեց շատերին: Շատ լուրջ պոտենցիալ կա, բացի ինֆորմացիոն տեխնոլոգիաներից, ճարտարագիտական ոլորտը նույնպես շատ լուրջ զարգացում է ապրել: Խոսքը գնում է այսօրվա աշխարհի ամենաառաջատար ուղղությունների մասին, ինչպիսիք են մարդու կողմից չկառավարվող մեքենաները, միկրոէլեկտրոնիկան և այլն:
– Ջրվեժում նման քաղաքի կառուցումը նաև կխթանի չէ՞, որ մարդկային ռեսուրսների արտահոսք չլինի, այլ կարողանանք մեզ մոտ պահել ու աշխատանքով ապահովել:
– Հակառակը՝ ոչ թե գնալու խնդիր կա, այլ այստեղ մարդկանց քանակն ավելացնելու: Երեկ «Նեյշնլ Ինսթրումենթս»–ի հետ քննարկման ժամանակ նույնիսկ խոսվեց, որ Հայաստանի փոքրությունը և մասնագետների կոնցենտրացիան մեկ վայրում շատ լուրջ համեմատական առավելություն է տալիս: Շատ խնդիրներ, որ հնարավոր չէ Ռուսաստանում կամ ԱՄՆ–ում արագ լուծել, Հայաստանում հնարավոր է զուտ փոքրության և նաև դիրքի տեսակետից: Օրինակ՝ Հայաստանը շատ հարմար է ամերիկյան կազմակերպություններին՝ ռուսական շուկայի համար աշխատելու տեսանկյունից և այլն:
Շարունակությունը` «Փաստ» օրաթերթի այսօրվա համարում