«Քուանշ, պարոն գլխավոր դատախազ»

Ազգային ժողովի այսօրվա արտահերթում շարունակվում է ՀՀ գլխավոր դատախազության 2016 թվականի հաշվետվությունը:

 

 

Past.am-ի փոխանցմամբ՝ «Ելք» դաշինքի խմբակցության ղեկավար Նիկոլ Փաշինյանը հանդես եկավ «Քուանշ, պարոն գլխավոր դատախազ» անունը կրող ելույթով: Նա հիշեցրեց, որ, որ քուանշ բլոտում տալիս են՝ դիմացինի ասածը կասկածի տակ դնելու համար:

 

Առաջին «քուանշը» վերաբերում էր Մարտի 1-ի գործին:

«Գլխավոր դատախազն ասում է, որ իրականացվում են անհրաժեշտ գործողություններ՝ 2008- Մարտի 1-ի սպանությունների բացահայտման, դրանք կատարած անձանց մեղադրանքը հիմնավորելուն ուղղված ապացույցներ ձեռք բերելու ուղղությամբ»:

«Քուանշ, պարոն գլխավոր դատախազ, դուք ուզում եք ասել, որ հիմա որևէ գործողությո՞ւն եք կատարում Մարտի 1-ի գործով: Դուք կարո՞ղ եք սրել և ցույց տալ քննչական որևէ գործողության արձանագրություն, որ իրավապահ համակարգը որևէ գործողություն կատարում է: Դուք այդ հերթապահ նախադասությունը արտասանող արդեն 3-րդ գլխավոր դատախազն եք»,-նշեց պատգամավորը:

Փաշինյանի խոսքով՝ բոլոր զոհերը, բացի Տիգրան Աբգարյանից և Համլետ Թադևոսյանից, քրգործում բնորոշված են որպես զանգվածային անկարգության մասնակիցներ:

« «Չերյոմուխայի» 7 հատուկ միջոցի կիրառմամբ սպանված 7 ցուցարարների անուն-ազգանունները հայտնի են, 5 ոստիկանի կիրառած զենքով սպանվել են 3 հոգի, վկա չկա՞, չգիտե՞ք մարդկանց տեղակայման վայրերը, ե՞րբ են կրակել, ինչպե՞ս են կրակել: Բա ասում էիք՝ հազարավոր ժամեր նկարված տեսանյութեր կան, այդ տեսագրություններն ո՞ւր են, կորա՞ն, , Քոչարյանն է ասել, որ վիդեոներ կան, որտեղ ամեն ինչ նկարագրված է: Ամեն ինչ նկարագրված է, բացի սպանությունների կատարման դրվագների՞ց»:

 

Երկրորդ «քուանշը» Փաշինյանը տվեց «Սասնա ծռեր» խմբի անդամների տեսակցությունների արգելքին: Ըստ նրա՝ մեկ տարի է անցել, բայց այդ մարդկանց թույլ չեն տալիս տեսակցել անգամ իրենց երեխաներին: Գլխավոր դատախազն ԱԺ-ում ասել էր, որ մեղադրյալը կարող է ապօրինի ներգործություն ունենալ վարույթի իրականացման վրա. «Այդ մարդկանց՝ իրենց երեխաների հետ հանդիպել թույլ չտալը պայմանավորված է քրգործի շահերով:  Քուանշ, պարոն գլխավոր դատախազ, ձերբակալված և կալանավորված անձանց պահելու մասին օրենքն ասում է, որ մերձավոր ազգականների հետ թույլատրել տեսակցել՝ ծառայողների հսկողությամբ: Եթե նրանց հետ տեսակցություն թույլ տված լինեին և տեսնեին, որ, օրինակ, Ժիրայր Սեֆիլյանի 11-ամյա տղան փորձում է հորը ատոմային ռումբ փոխանցել, այդ ժամանակ արդարացում կունենային, կասեին՝ այս մարդկանց մանկահասակ երեխաները փորձում են խոչընդոտել, ընդհատել ենք: Իսկ այսպես ուղղակի արգելք դնելը, խոշտանգում է»:

 

Երրորդ «քուանշը» Անդրիաս Ղուկասյանի խափանման միջոցը փոխելու «Ելքի» երաշխավորման հետ էր կապված: Նա մեջբերեց գլխավոր դատախազի արձագանքը, որ Ղուկասյանի պատշաճ վարքագիծը չեն կարող երաշխավորել: Փաշինյանի հիշեցերեց՝ ինքը և Մանե Թանդիլյանը որպես երաշխավոր են հանդես եկել:

«Բա եթե մի ամբողջ խմբակցության ասելը ձեր համար երաշխիք չի, բա ո՞ւմ համար է երաշխիք: Պիտի Անդրիաս Ղուկասյանը մարդասպան ռեցիդիվիստ լինե՞ր, որ ՀՀԿ-ի համար իմանայիք ձայներ է ապահովելու իր քուչում, ներում տայիք, ազատեի՞ք: Ընդհանրապես, ինչ ասում եք՝ ամեն ինչը կասկածի տակ է, ծայրից ծայր սուտ է, որովհետեւ դուք օրենքով չեք առաջնորդվում, դուք ամեն օր Բաղրամյան 26-ից հրահանգներ եք ստանում՝ էս մեկին ազատել, էս մեկին բռնել, էս մեկի վրա սարքել, էս մեկի վրա չսարքել, էս մեկին նկատել, էն մեկին չնկատել»»,-ասաց նա:

Փաշինյանն ասաց, որ եթե 9 պատգամավորի ասածը Դավթյանի համար երաշխիք չի, իր ասածն էլ իրենց համար երաշխիք չի, ծայրից ծայր սուտ է::

 

Հաջորդ «քուանշը» «Հաց բերողի» հետ էր կապված: Նիկոլ Փաշինյանն հիշեցրեց, որ գլխավոր դատախազին զգուշացրել են Արթուր Սարգսյանի կալանքը փոխել, զգուշացրել են, որ մահանալու է, սակայն վերջինս չի լսել:

««Հաց բերողը» հեղինակություն էր, մեր ժամանակների հերոսն էր, ուստի իշխանությունները չհանդուրժեցին, որ Սերժ Սարգսյանից բացի զուգահեռ ուրիշ հերոս լինի»,-ընդգծեց Փաշինյանը:

 

 

Անդրադառնալով գլխավոր դատախազի հայտարարոությանը, թե դատական համակարգում կոռուպցիոն ռիսկերը զրոյացված են՝ Նիկոլ Փաշինյանը հայտարարեց. «Քյարփինջը կապույտ»:

 

Կիսվել