Փաշինյանի փչացած ռադիոն
ՎԵՐԼՈՒԾԱԿԱՆՓաշինյանի բարձրագոչ ելույթները սկսում են հոգնեցնել: Ընդ որում հոգնեցնում են անկախ ասելիքի բովանդակությունից: Սա այն դեպքն է, երբ բովանդակությունը կարևոր չէ, նաև Փաշինյանի համար: Կարևորը ոճն է, որով Փաշինյանը մատուցում է ասելիքը; ԱԺ ամենասկանդալային ու դիտվող պատգամավոր լինելու փառքը Փաշինյանին հանգիստ չի տալիս: Նա ցանկանում է չզիջել դիրքերն ու չափաբաժինը պահել տեղում:
Պոպուլիստների հետ նման բաներ հաճախ են պատահում: Այլ տարբերակ, ըստ էության չկա: Պոպուլիզմի չարաշահումը թմրամոլության պես բան է: Այս դեպքում սակայն «թմրամոլը» ոչ թե Փաշինյանն է, այլ նրա թիրախավորած լսարանը, ով անընդհատ սովոր է Փաշինյանից սկանդալային տեսանյութերով չափաբաժիններ ստանալ: Փաշինյանն այս դեպքում թմրավաճառի դերակատարում է ստանձնում:
Խնդիրը, սակայն, կայանում է նրանում, որ ինչքան էլ սուր լինեն մատուցածդ չափաբաժինները, թմրամոլների մոտ միշտ ավելիի ցանկություն կա: Իսկ ավելին միշտ մատուցել դժվար է: Մանավանդ Հայաստանի տաղտուկ քաղաքական կյանքում: Փաշինյանը չի կարող ԱԺ ամեն նիստի ժամանակ թրենդային թեմա որսալ, մանավանդ եթե զուգահեռ, հանրային կյանքում աղմկահարույց դեպքեր տեղի չեն ունենում:
Իսկ մինչ այդ թմրամոլների, այս դեպքում ՝ Փաշինյանի թիրախային լսարանի մոտ սկսվում է մեկ այլ հայտնի պրոցես ՝ «լոմկա» անունով: Ինչը ուղղակիորեն անդրադառնում է ընդդիմադիր պատգամավորի ռեյտինգի վրա: Եվ իր կրկնվող ու հոգնեցնող ելույթներով նա ընդամենը փորձում է պահել չափաբաժինը:
Շատերին կթվա, թե նա անպիտան գործով է զբաղված: Ամենևին ոչ: Այդ գործելաոճը նախորդ չորս տարիների ընթացքում օգնեց Փաշինյանին վարկանիշ հավաքել ու նորից հայտնվել պառլամենտում:
Սարգիս Մեսրոպյան