Ադրբեջանի հյուծիչ պատերազմը և Սարգսյան-Ալիև անձնական զրույցի անհուսալիությունը
ՎԵՐԼՈՒԾԱԿԱՆՍարգսյան-Ալիև Ժնևյան հանդիպումից մի քանի օր է անցել, բայց արդեն երկրորդ սահմանային միջադեպն է գրանցվում: Արդեն այսօր հայտնի դարձավ, որ ՊԲ երկու զինծառայող մահացու վիրավորում են ստացել, պաշտոնական վարկածով զենքի հետ անզգուշ վարվելու պատճառով:
Ստացվում է ինչ ` Ադրբեջանը շարունակում է հյուծիչ պատերազմ վարելու իր քաղաքականությունը: Իսկ Սարգսյան-Ալիև անձնական զրույցը, որ պիտի սահմանային միջադեպերը նվազեցնելու երաշխիք լիներ, դառնում է թղթի վրա գրված փուչ բառակապակցություն, ոչ ավելին: Այն դեպքում, երբ նախքան այդ միջանձնային զրույցը կային Վիեննայի և Պետերբուրգի անվտանգության երաշխիքներ, որոնք եթե ոչ ռազմական, գոնե քաղաքական հակադարձման գործիք էին Հայաստանի համար նման միջադեպերի դեպքում:
Հյուծիչ պատերազմը ուղղակի հարված է Հայաստանի բարոյահոգեբանական մթնոլորտին: Շնորհիվ տեղեկատվական ցենզուրայի Ադրբեջանում, վերջինս նվազեցնում է հյուծիչ ու դանդաղ պատերազմի ազդեցությունն իր հասարակության վրա: Հայաստանում տեղեկատվական ցենզուրա չկա և ամեն մի զոհ ընկալվում է որպես հերթական օղակ դեպրեսիվ շղթայի մեջ: Այլ է իրավիճակն, ասենք, լայծանավալ գործողությունների դեպքում, որի ժամանակ հայաստանյան հասարակությունը միավորվելու կամք է դրսևորում:
Ալիև-Սարգսյան բանակցություններն, այս իմաստով ոչինչ չեն տալիս, եթե չասենք ավելի են խորացնում այդ բանակցությունների անարդյունավետության թեզը, հետևաբար ` ավելի են մոտեցնում կոնֆլիկտի լուծման ռազմական տարբերակը:
Սարգիս Ալավերդյան