«...Իսկ ես կասեմ, որ մեր ժողովուրդը միայն սոցիալական հարցերով է համախմբվում»
ՀԱՐՑԱԶՐՈՒՅՑ«Փաստ» օրաթերթի հյուրն է Ազգային ժողովի պատգամավոր, «Ելք» խմբակցության անդամ Գևորգ Գորգիսյանը
– Պարոն Գորգիսյան, «Ելք» խմբակցությունը պատրաստվում է երթ անցկացնել գնաճի դեմ: Ինչպե՞ս եք գնահատում դրա արդյունավետությունը: Գնաճը կարելի՞ է երթի միջոցով կանխել:
– Իհարկե, կարելի է: Քանզի ներկա գնաճի հիմնական պատճառը Հարկային նոր օրենսգիրքն է, որի փոփոխությունների համար մենք փորձեցինք օգտագործել խորհրդարանական հարթակը, առաջարկներ ներկայացրեցինք: Բայց դրանք մերժվեցին: Ապա փոփոխությունների առաջարկություններով հանդես եկավ «Ծառուկյան» խմբակցությունը: Դրանք ևս մերժվեցին:
Հասկանալի դարձավ, որ Հանրապետական կուսակցությունը տրամադրված չէ Հարկային օրենսգրքում իրականացվելիք որևէ փոփոխության:
Իսկ այս պարագայում միակ տարբերակը մնում է հասարակական բողոքը: Չնայած և՛ Հանրապետական կուսակցությունը, և՛ նրանց կոալիցիոն գործընկեր կուսակցության պատգամավորները մի քանի առիթներով նշել են, որ հասարակությունը գոհ է այս վիճակից, չեն դժգոհում թանկացումներից: Կարող են և կարտոֆիլ ուտելով ապրել: Բայց խնդիրն այն է, որ կարտոֆիլն էլ է թանկացել:
Եվ մնում է մի բան, որ հասարակությունը բողոքի իր ձայնը բարձրացնի և ասելիքն ասի: Որպեսզի դրսում հենարան ունենալով, մենք ևս կարողանանք խորհրդարանում կրկին կռիվ տալ:
– Իսկ դուք վստահո՞ւմ եք հասարակությանը: Այս հասարակությունը, որը 5–10 հազար դրամ վերցնելով ընտրեց այս իշխանություններին, դուրս կգա՞ փողոց:
– Իհարկե, դուրս կգա: Որովհետև մեզ մոտ ընտրությունները, ցավոք սրտի, դեռևս քաղաքական չեն:
Նաև, ցավոք, դեռևս քաղաքացիներից շատերն իրենց ընտրության հետևանքները չեն գիտակցում: Իսկ այժմ նույն այդ մարդիկ այդ ամենը զգացին սեփական մաշկի վրա: Քանզի նոր տարվա թոհուբոհը անցավ, Հարկային օրենսգիրքը մտավ կիրառության մեջ, և տեսան, որ բենզինը թանկացել է, մթերքները թանկացել են:
Արդեն նախանշանները կան. կարծես երթուղայինների վարորդները ևս պատրաստվում են բողոքի ակցիաներ անել: Որովհետև գծատերերին՝ իրենց մուծումների չափը մնացել է նույնը, բայց գազի գինը, որով լիցքավորում են ավտոմեքենաները, բարձրացել է: Իսկ այս մարդիկ մի կերպ են ծայրը ծայրին հասցնում, նրանց եկամուտը հազիվ է բավարարում օրվա կարիքների համար:
Միաժամանակ միանշանակ է, որ թանկացումներն ազդելու են անխտիր բոլոր խավերի վրա: Քանզի եթե թանկանում է վառելանյութը, կթանկանան բոլոր ապրանքատեսակները: Որովհետև ցանկացած ապրանքի ինքնարժեքի մեջ, հատկապես՝ ներկրվող ապրանքի, մեծ բաժին է կազմում տեղափոխման ծախսը:
Ավելին՝ թանկացումների այս ալիքը դեռ մեծանալու է, այնպես չէ, որ մի բան թանկացավ, ու կանգ առավ պրոցեսը: Այն լինելու է շարունակական, ու ամեն ինչն է թանկանալու:
Ավելացրած՝ հունվարի աշխատավարձերը մարդիկ արդեն պակաս են ստանալու: Որովհետև Հարկային նոր օրենսգրքով նաև քաղաքացիների վրա եղած հարկային բեռն է ավելացել: Մինչև 150 հազար աշխատավարձ ստացողների համար եկամտահարկը, ճիշտ է, նվազել է 1,4%–ով, բայց հիշենք, որ հուլիսի 1–ից սկսելու է գործել նաև կենսաթոշակների պարտադիր կուտակային համակարգը: Եվ այս դեպքում մարդկանց աշխատավարձը նվազելու է արդեն 5–7%–ով: Այնպես որ, աշխատավարձի առումով դրական տեղաշարժ չկա:
Դեռ չեմ խոսում 150 հազարից բարձր աշխատավարձ ստացողների մասին, որոնց եկամտահարկը լրջորեն ավելանալու է:
– Բայց գիտե՞ք, թե դերակատարներն ինչից են օգտվում. ասում են, որ մեր ժողովուրդը սոցիալական հարցերի համար փողոց դուրս չի գալիս: Պատմությունն էլ է դա ցույց տալիս: Ա՛յ, ազգային հարց լինի, խնդրե՛մ:
– Վերջին տարիներին այն մի քանի լուրջ շարժումները, բողոքի ակցիաները, որ եղել են մեր երկրում, եղել են սոցիալական հարցերով: Տրանսպորտի թանկացման դեմ բողոքը, կուտակային կենսաթոշակային համակարգի ներդրման դեմ բողոքը, էլեկտրիկ Երևանը: Սրանք բացառապես սոցիալական նշանակության շարժումներ էին: Ընդհակառակը, իսկ ես կասեմ, որ մեր ժողովուրդը միայն սոցիալական հարցերով է համախմբվում:
– Իշխող կուսակցությունն էլ ցանկանում է թանկացումների վերաբերյալ լսումներ հրավիրել: Այն ի՞նչ կարող է տալ:
– Դա բացարձակապես անիմաստ բան է: Կա Հարկային օրենսգիրք, որն ընդունվել է 2016 թվականին, և որն էլ հանգեցրել է թանկացումների: Էլ ի՞նչ կարող են տալ լսումները:
– Եվ Հարկային օրենսգիրքն էլ հենց իրե՛նք են ընդունել՝ լսումներ կազմակերպող քաղաքական այդ ուժը:
– Այո՛: Փաստորեն, լսումներ կազմակերպելով այդ նույն ուժը ցանկանում է քաղաքացիների աչքերին թոզ փչել: Թե տեսեք, մենք՝ հանրապետականներս, ևս մտահոգ ենք թանկացումներով ու փորձում ենք հետազոտել հարցը:
Բայց հետազոտելու բան չկա: Իրենք են ընդունել օրենսգիրքը, իրենք էլ գիտեն, որ թանկացումները դրանից են եղել: Էլ ի՞նչն են հետազոտելու: Աբսուրդ է այդ ամենը:
Գոհար Սարդարյան