Սերգեյ Բագրատյանը՝ կառավարության անգործության, ծայրահեղ քայլերի և նախագահի քվեարկության մասին
ՔԱՂԱՔԱԿԱՆԼրագրողների հետ հանդիպման ժամանակ ԱԺ «Ծառուկյան» խմբակցության պատգամավոր Սերգեյ Բագրատյանը տեղեկացրեց, որ ԲՀԿ առաջնորդ Գագիկ Ծառուկյանն արտերկրում է, այդ պատճառով ՀՀ նախագահի թեկնածու Արմեն Սարգսյանի հետ հանդիպում առայժմ չի կայացել: Այդ մասին հայտնում է Past.am-ը: Բագրատյանն ասաց, որ Գագիկ Ծառուկյանը մոտ օրերս Հայաստան կվերադառնա, որից հետո կլինի հանդիպումը:
«Այն հարցերը, որ փորձելու ենք ուղղել նախագահի թեկնածուին, լինելու են քաղաքական տրամաբանության մեջ: Պատասխաններն էական կլինեն մեր որոշման համար, որը պարոն Ծառուկյանը կամփոփի: Մեր որոշումը կշռադատված և ի շահ ժողովրդի է լինելու:Պետք է հասնենք այն կետին, որ անձնավորված կառավարում լինի, անձի կարողությունները գրեթե նշանակություն չունենան, կարևոր լինեն ինստիտուտները»,- նշեց պարոն Բագրատյանը:
Պատգամավորն անդրադարձավ նաև կառավարության գործունեությանը՝ նշելով, որ դժգոհ են: «Ցավոք, կառավարությունն ականջալուր չի լինում մեր նախաձեռնություններին: Կառավարության այն կազմը, որը պետք է ԱԺ-ն հաստատի, մեզ համար խիստ վիճահարույց է: Ինչպես գիտեք, տարբեր նախարարություններ նույն գործառույթներն են իրականացնում, և նպատակահարմար կլիներ, որպեսզի նախարարությունների կազմը, թվաքանակը և գործունեության ոլորտները նորովի դիտարկվեին: Մենք դժգոհ ենք ոչ թե Կարեն Կարապետյան անձի աշխատանքից, այլ՝ կառավարության աշխատանքից: Ժողովրդի կյանքում ոչ մի բան չի փոխվում, աշխատավարձերը, ոչ էլ կենսաթոշակներն են բարձրացվում, որևէ բարեփոխում չի իրականացվում: Կառավարությունն արդյունավետ չի աշխատում»,- ընդգծեց բանախոսը: Սերգեյ Բագրատյանի խոսքով՝ կառավարության անգործությունը պետք է դրդի պայքարի ծայրահեղ քայլերի, իսկ ամենաընդունված ծայրահեղ քայլը փողոցն է: