Ասում են` խառը կանաչին էժանացել է. Փաշինյան
ՔԱՂԱՔԱԿԱՆԱրդեն հայտնել ենք, որ Երևանի Շարլ Ազնավուրի հրապարակից մեկնարկեց «Ելք» դաշինքի հանրահավաք-երթը: Պատգամավոր Արարատ Միրզոյանը, խոսելով գնաճի վերաբերյալ Աժ-ում կազմակերպած լսումներին, կարծիք հայտնեց, որ դա ցինիզմ էր: «Ես այդ լսումներին երբ նստած էի, մտածում էի, որ հիմա կբերեն հանրապետության գլխավոր հոգեբույժին, որը տեղեկանք կներկայացնի այն մասին, որ այս ժողովուրդը ցնդել է՝ խոսում է թանկացումներից, բայց թանկացումներ չկան: Երևի մտածում են, որ տեղ ունեն այսպես խոսելու, քանի որ երբ պետք է լինում, օգտվելով ժողովրդի ծայրահեղ վիճակից, տասը հազար դրամով գնում են ժողովրդի քվեն։ Կամ մտածում են՝ 1000 - 2000 հոգի է մասնակցում թանկացումների դեմ ակցիաներին: Նրանք չարաչար սխալվում են, քանի որ դա չի նշանակում, որ այդ 2 հազար հոգին են դժգոհ այդ թանկացումներից, այլ ամբողջ երկիրն է դժգոհը»,-ասաց նա:
Նախկին վարչապետ, պատգամավոր Արամ Սարգսյանն էլ նշեց. «Վարչապետն ԱԺ-ում փորձեց հիմնավորել, որ տնտեսության մեջ չորս տոկոս գնաճը տնտեսությանն օգուտ է։ Այսինքն՝ ուզում է ասել, թե թանկացումներն անում են ժողովրդի համար։Խնդիրը միայն թանկացումները չեն, թանկացումներով միայն մեր կյանքը ծանր դարձնելով չէ։ Խնդիրը Հայաստանի կայունությանն է վերաբերում, այդ տնտեսության ողջ մնալուն։ Հայաստանում նման քաղաքականությամբ դեռ երեսուն տարի ոչ արտագաղթի տեմպերը կիջնեն, ոչ էլ տնտեսությունը կվերականգնվի։ Հայաստանին հրաշք, նոր միտք է պետք»,- նշել է Արամ Սարգսյանը։Սարգսյանը հեռանկարային է համարում ՏՏ ոլորտը:
Վերջինս խոսեց նաև աջ ղեկով մեքենաների արգելքի մասին՝ նշելով որ, եթե արգելում են այդպիսի մեքենաները, քաղաքացին այդ գումարով ավելի հին մեքենա կգնի, որն ավելի վտանգավոր է, էկոլոգիային ավելի շատ վնաս է հասցնում, քան աջ ղեկով մեքենան:
Սարգսյանի ելույթին հաջորդեց Շառլ Ազնավուրի հրապարակ-Աբովյան փողոց-Հանրապետության հրապարակ-Ամիրյան փողոց-Մաշտոցի փողոց-Սայաթ Նովա փողոց-Աբովյան փողոց-Շառլ Ազնավուր հրապարակ երթուղով երթը:
Վերջին ելույթը Նիկոլ Փաշինյանինն էր: «Թանկացումները հասել են նաև դպրոցների բուֆետներ։ Եվ այս իրավիճակում իշխանություններն ասում են, թե խառը կանաչին էժանացել է 30 տոկոսով։ Այս մոտեցումը մենք համարում ենք անթույլատրելի: Պատմագրության մեջ կան ժամանակաշրջաններ, օրինակ՝ բրոնզե, երկաթե, իսկ կարծում եմ, որ մեր ընթացիկ դարաշրջանը կոչվելու է խառը կանաչու դարաշրջան»,-հեգնեց Փաշինյանը: