Իրանը Թուրքիայի «Ձիթենու ճյուղ» գործողության մասին
ՄԻՋԱԶԳԱՅԻՆՊաշտոնական Թեհրանը դատապարտել է սիրիական Աֆրինում Թուրքիայի զինված ուժերի կողմից ռազմական գործողությունների իրականացումը, գրում է թուրքական «Հուրիեթ» պարբերականը:
Իրանի արտաքին գործերի նախարարության խոսնակ Բահրամ Քասեմին ընդգծել է, որ ներքին պատերազմի հետևանքով մասնատված Սիրիայում թուրքական կողմի նախաձեռնած «Ձիթենու ճյուղ» գործողությունն ավելի կմեծացնի լարվածությունը:
«Թուրքիան պետք է դադարեցնի գործողություններն ու հարգի Սիրիայի ինքնիշխանությունն ու տարածքային ամբողջականությունը»,- ասել է Քասեմին:
Հիշեցնենք, որ Թուրքիայի գործողություններին աջակցում է նաև Սիրիայի ընդդիմադիր «Սիրիական ազատ բանակը»: Ահաբեկչական տարրերի դեմ պայքարելու հիմնավորմամբ թուրքական զինուժն իրականում գործողություններն ուղղում է քրդերի, այդ թվում նաև խաղաղ բնակչության դեմ:
Եվ, չնայած, պաշտոնական Դամասկոսը դատապարտել է Աֆրինում Թուրքիայի գործողությունները և հայտարարել, որ Աֆրինը Սիրիայի անբաժան մասն է, սակայն դա չի խանգարում Թուրքիային շարունակել իր զավթողական քաղաքականությունը և անկայություն սերմանել սիրիական տարածքում: