Ներկա պահին Ուկրաինայի հետ հակամարտության սրումը ՌԴ-ին ձեռնտու չէ
ՎԵՐԼՈՒԾԱԿԱՆՎերջերս բրիտանական և ամերիկյան պարբերականներում կրկին սկսվեց շրջանառվել այն տեսակետը, որ «Ռուսաստանը սովորաբար ագրեսիա է դրսևորում ամեն անգամ, երբ աշխարհը ներգրավված է այլ խնդիրներով»։ Սակայն այս անգամ Ռուսաստանը ոչ թե հարձակում իրականացնողն էր, այլ «պաշտպանվող կողմը»։
Օգոստոսի 10-ին Ռուսաստանի Անվտանգության դաշնային ծառայությունը (ԱԴԾ) հայտարարեց, որ Ղրիմում ահաբեկչության կազմակերպելու մեղադրանքով երկու կասկածյալ է ձերբակալվել: Մոսկվան ուկրաինացի դիվերսանտների նկատմամբ մեղադրանք է հարուցել թերակղզու տարածք ներխուժելու և ԱԴԾ-ի աշխատակցի ու մեկ զինծառայողի սպանության համար:
Ուկրաինական կողմը, հերքելով բոլոր մեղադրանքները, Ղրիմի հետ սահմանին ծանր զրահատեխնիկա է տեղակայել՝ բարձրացնելով զորքերի մարտական պատրաստվածության մակարդակը: Արևմուտքն այնքան էլ հակված չէ հավատալու Մոսկվայի պնդումներին և ավելի շուտ կատարվածը կապում է Ուկրաինայի՝ ՆԱՏՕ-ին անդամակցելու ճանապարհին խոչընդոտներ ստեղծելու հետ։
Նախ` Ռուսաստանի նախագահ Վլադիմիր Պուտինի՝ եվրոպական երկրներին ու ԱՄՆ-ին Սիրիայում ԻԼԻՊ-ի դեմ պայքարելու համար կոալիցիա ձևավորելու վերաբերյալ կոչերը մեկնաբանվեցին որպես ուկրաինական ճգնաժամից միջազգային հանրության ուշադրությունը շեղելու փորձեր: Իսկ այժմ ահաբեկչություններ կազմակերպելու վերաբերյալ մեղադրանքներով, ըստ որոշ փորձագետների, Պուտինը փորձում է համոզել Արևմուտքին, որ պայմանավորվածություններն իրականում Կիևն է խախտում: Նա հույս ունի նման մարտավարությամբ ստիպելու Եվրոպային ճնշում գործադրել Կիևի վրա:
Ամերիկյան Time պարբերականը գրում է, որ ՌԴ-ն թերակղզում իր վերահսկողությունն ամրապնդելու համար կամ հսկայական գումարներ պետք է ծախսի նոր ենթակառուցվածքներ ստեղծելու համար, ինչպես օրինակ՝ կամուրջներ, էլեկտրական հաղորդալարեր, խողովակաշարեր և այլն կամ էլ ընտրի ավելի վտանգավոր տարբերակ՝ ներխուժի Ուկրաինա և կամուրջ անցկացնի երկրի արևելյան և հարավային շրջաններից դեպի Ղրիմ: Եթե Ռուսաստանը նման նպատակ է հետապնդում, ապա իսկապես իդեալական ժամանակահատված է ընտրել. ԱՄՆ-ն զբաղված է նախագահական ընտրություններով, ԵՄ-ն՝ Brexit-ով, սրան գումարած օլիմպիական խաղերը։ Բրիտանական The Times պարբերականը նշում է, որ Պուտինին արտաքին ճգնաժամն անհրաժեշտ է ներքին խնդիրները լուծելու համար:Ռուսաստանում կայանալու են Պետդումայի ընտրություններ, և թեև ընդիմությունն իշխանության հասնելու հնարավորություններ չունի, երկրում գնալով դժգոհությունն ավելանում է:
Բացի այդ, իրավիճակի սրումը «կազատի Պուտինին» խաղաղ բանակցություններ անցկացնելու և որևէ զիջման գնալու անհրաժեշտությունից: Միևնույն ժամանակ, չի բացառում, որ այս պահին Ռուսաստանը չի ձգտում Ուկրաինայի հետ պատերազմ սկսել. այն իմաստ չունի, քանզի Ղրիմին նոր պատժամիջոցներ պետք չեն: Պատժամիջոցների չեղարկման համար անհրաժեշտ է, որպեսզի Ռուսաստանը և Ուկրաինան իրագործեն Մինսկի համաձայնագրով ստանձնած պարտավորությունները, սակայն երկու կողմը միմյանց է մեղադրում իր մասը չիրագործելու մեջ:
Օգոստոսի 15-ին Եկատերինբուրգում ՌԴ արտգործնախարար Սերգեյ Լավրովի հետ կայացած հանդիպման ժամանակ Գերմանիայի ԱԳ նախարար Ֆրանկ-Վալտեր Շտայնմայերն ընդգծել է, որ Դոնբասում ստեղծված իրավիճակը հնարավորություն չի տալիս անգամ խոսելու ՌԴ-ի դեմ կիրառած պատժամիջոցների չեղարկման մասին: Լավրովը ՌԴ-ի և ԵՄ-ի միջև համագործակցության բոլոր մեխանիզմները վերականգնելու հույս է հայտնել:
Հետևաբար, ներկայիս ծանր տնտեսական պայմաններում ՌԴ-ին իսկապես ձեռնտու չէ այս հակամարտության սրումը, քանզի այն նոր պատժամիջոցների կիրառման առիթ կհանդիսանա:
Անի Գասպարյան