«Պայքարենք Գյումրիի հաղթանակի համար». «Փաստ»

«Փաստ» օրաթերթը գրում է

Հարցազրույց Գյումրու ավագանու ընտրությունների ՀՀԿ ցուցակը գլխավորող Արտյոմ Ղուկասյանի հետ:

- Պարոն Ղուկասյան, հոկտեմբերի 17-ի ընտրություններին դուք մասնակցում եք «Մենք ենք, մեր Գյումրին» կարգախոսով։ Ո՞րն է ձեր հիմնական ուղերձը գյումրեցուն, ինչո՞ւ պետք է քաղաքի բնակիչներն ընտրեն հատկապես ձեզ։

- Մեր ուղերձներն իրականում բազմաթիվ են և արտահայտված են նախընտրական ծրագրում, սակայն, եթե ընդհանրացնենք, ապա այդ կարգախոսով ցանկացել ենք ընդգծել միասնականության, համախմբվածության կարևորությունը Գյումրիի այսօրվա ու հատկապես վաղվա համար։ «Մենք ենք, մեր Գյումրին» կարգախոսն ուղղակի գեղեցիկ արտահայտություն չէ, այլ այն փիլիսոփայությունը, աշխարհայացքը, որը կրում է մեր թիմը։ Գյումրին յուրաքանչյուրինս է՝ անհատապես, և բոլորինս է՝ հավաքականորեն, ապրելով Գյումրիում՝ մենք իրացնում ենք մարդու կարևորագույն՝ պատկանելության պահանջմունքը, մենք մեզ համարում ենք այս համայնքի մասնիկը, ինչը որքան հաճելի, նույնքան էլ պարտավորեցնող զգացողություն է։

Դա նշանակում է, որ մենք քաղաքին պետք է վերաբերվենք փոխադարձության սկզբունքով, ոչ միայն ուղղակի հպարտանանք գյումրեցի լինելու բարեբախտությամբ, այլ մեր կարողացածի չափով տանք մեր քաղաքին՝ մեր վերաբերմունքով ու աշխատանքով։ Հատկապես այսպիսի դժվարին ժամանակներում հաջողության հասնելու համար կարևոր են ոչ միայն գաղափարները, ծրագրերը, այլ նաև ոգին, ոգեղենությունը։ Գյումրեցու բացառիկ ոգու մասին մենք գիտենք մեզ հասած ավանդություններով, և այդ ոգու արտահայտման կարիքը մենք ունենք նաև այսօր։ Մենք մեր առաքելությունը հաջողված կհամարենք, եթե կարողանանք նախընտրական քարոզարշավի ընթացքում գյումրեցիների հետ երկխոսության, քննարկումների միջոցով թեկուզ մեկ պայմանական կետով արթնացնենք միայն մեզ բնորոշ Գյումրվա ոգին ու միասնականությունը։ Հիմա մեզ դա անհրաժեշտ է առավել, քան երբևէ։

- Ձեր մասնակցությունը պետք է դիտարկել ավելի շատ քաղաքակա՞ն, թե՞ համայնքային հարթությունում՝ հաշվի առնելով հանգամանքը, որ ձեր ներկայացրած քաղաքական թիմը՝ ՀՀԿ-ն, այսօր հանդես է գալիս արմատական ընդդիմության դիրքերից։

- Այո, մեր քաղաքական թիմը՝ ՀՀԿ-ն, արմատական ընդդիմություն է և պայքարում է երկրում ստեղծված աղետալի իրավիճակի հաղթահարման, դրանց պատճառների վերացման համար։ Սակայն մենք որոշում ենք կայացրել չափից ավելի չքաղաքականացնել ավագանու ընտրությունները և տարանջատել համայնքային խնդիրները քաղաքական գլոբալ օրակարգից։ Այս ընտրություններով մենք ձևավորելու ենք քաղաքային իշխանություն, որն ունի առավելապես քաղաքի խնդիրների լուծման, դրա զարգացմամբ զբաղվելու սահմանադրական և օրենսդրական պարտականություններ ու սահմանափակումներ։ Այդ իմաստով պատեհ չէ ավագանու ընտրությունները վերածել համապետական քաղաքական մրցապայքարի, որովհետև դրանից մեր քաղաքը վստահաբար չի շահի։ Մենք՝ որպես ՀՀԿ անդամներ, հավատարիմ ենք մեր կուսակցության որդեգրած քաղաքական գծին, սակայն ամենևին նպատակ չունենք ուղղակի աղմուկի համար օգտագործել ավագանու ընտրությունները մի նպատակով, որը չի նպաստելու քաղաքի խնդիրների լուծմանը։

Դա, իհարկե, չի նշանակում, թե մենք չենք խոսելու քաղաքականության մասին, ամենևին։ Տեղական ինքնակառավարման մարմիններն ունեն կարևորագույն քաղաքական նշանակություն, դրանց միջոցով է իրացվում դեմոկրատական հասարակությունների գլխավոր՝ մասնակցային ժողովրդավարության սկզբունքը, որով ապահովվում է քաղաքացիների մասնակցությունը որոշումների կայացման գործընթացին։ Դա էլ նույն դեմոկրատական համակարգի ցուցիչներից մեկի՝ իշխանության ապակենտրոնացման ապահովման հիմնական ճանապարհն է։ Իսկ այն, որ մենք ներկայացնում ենք Հայաստանի անկախության ակունքներում կանգնած ու մեր երկրի ամենակայացած քաղաքական ուժերից մեկը՝ ՀՀԿ-ն, լուրջ մրցակցային առավելություն է մեզ համար, քանի որ Գյումրիի զարգացման գործում մենք օգտագործելու ենք կուսակցության ողջ ինտելեկտուալ պոտենցիալը, փորձն ու ավանդույթները, բացի այդ, մեզ մեծապես նպաստելու է ՀՀԿ-ի թեկուզև քանակապես փոքր, բայց որակյալ ներկայացվածությունն Ազգային ժողովում՝ հատկապես Գյումրիին վերաբերող այն խնդիրների լուծման ժամանակ, որոնք պահանջում են օրենսդրական կարգավորումներ։

- Խոսեցիք մրցակցային առավելությունների մասին։ Հոկտեմբերի 17-ի ընտրություններին մասնակցում են աննախադեպ մեծ թվով՝ 10 քաղաքական ուժեր՝ ավելի քան 350 ավագանու թեկնածուներով։ Դժվար չի՞ լինելու պայքարն այդ պայմաններում։

- Շատ դրական եմ գնահատում մեծ թվով ուժերի մասնակցությունը, քանի որ, ինչպես ցանկացած հարցում, ընտրություններում՝ առավել ևս, մրցակցությունը հնարավոր լավագույն որոշում կայացնելու կարևոր նախապայմաններից մեկն է։ Նախընտրական քարոզարշավի մեկնարկին նախ՝ հաջողություն եմ մաղթում մասնակից բոլոր ուժերին՝ միաժամանակ ցանկանալով, որ պայքարն ընթանա բացառապես քաղաքակիրթ պայմաններում, կրի առավելապես ծրագրային, գաղափարական բնույթ և որևէ կերպ չտեղափոխվի անձնական հարաբերությունների տիրույթ, ինչից, ցավոք, զերծ չէ մեր քաղաքական մշակույթը։

Քարոզարշավը հրաշալի հնարավորություն է բոլոր մասնակիցների համար՝ մի կողմից՝ ստուգելու իրենց ծրագրերի կենսունակությունն ու մրցունակությունը, մյուս կողմից՝ հետագայում ճշգրտումներ կատարելու սեփական ծրագրերում՝ հաշվի առնելով բանավեճերում հնչած այլընտրանքային մոտեցումներն ու գաղափարները։ Այնպես որ, առողջ ու արգասաբեր քարոզարշավ եմ մաղթում ընտրությունների բոլոր մասնակիցներին։ Պայքարենք ոչ այնքան հանուն մեր թիմերի, որքան Գյումրիի հաղթանակի համար։

Մանրամասները՝ «Փաստ» օրաթերթի այսօրվա համարում