Կյանքից հեռացել է Արցախի վաստակավոր մանկավարժ Սմբատ Սաղյանը

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

73 տարեկանում կյանքից հեռացել է ԱՀ վաստակավոր մանկավարժ Սմբատ Զոհրաբի Սաղյանը։

Արցախի ԿԳՄՍ նախարարությունը ներկայացնում է Սմբատ Սաղյանի կենսագրությունը․

Ծնվել է 1950 թվականի հուլիսի 13-ին, ԼՂԻՄ-ի Մարտունու շրջանի Ճարտար գյուղում:

1968 թվականին ավարտել է Ճարտարի միջնակարգ դպրոցը:

1968 թվականին ընդունվել է ՀՀ Աբովյան քաղաքի թիվ 7 տեխնիկական ուսումնարանը:

1969-1974 թվականներին սովորել է ԵրՊՀ-ի քիմիայի ֆակուլտետում։

1974-1977 թվականներին Մարտունու շրջանի Ճարտար գյուղի Ղուզե Կալերի միջնակարգ դպրոցում աշխատել է որպես քիմիայի ուսուցիչ :

1977-1990 թվականներին աշխատել է Ուսուցիչների կատարելագործման մարզային ինստիտուտում՝ որպես քիմիայի կաբինետի վարիչ: Նույն տարիներին համատեղության կարգով աշխատել է Ստեփանակերտ քաղաքի թիվ 2 և ֆիզմաթ դպրոցներում:

1990 թվականի նոյեմբերից տեղափոխվել է Երևանի պոլիտեխնիկական ինստիտուտի Ստեփանակերտի մասնաճյուղ՝ որպես մեթոդիստ: 1991 թվականի սեպտեմբերից աշխատել է որպես ավագ դասախոս:

2007 թվականի մարտից նշանակվել է ԱրՊՀ քիմիայի ամբիոնի դոցենտի պաշտոնակատար, այնուհետև՝ դոցենտ:

Մինչև 2019 թվականը դասախոսել է ԱրՊՀ-ում։

Ունի 12-ից ավել գիտական և մեթոդական տպագրված աշխատանքներ:

Պարգևատրվել է ԱՀ վարչապետի մեդալով, մի շարք պատվոգրերով և գերատեսչական հուշամեդալներով:

2020 թվականին Սմբատ Սաղյանին շնորհվել է ԱՀ վաստակավոր մանկավարժի կոչում:

Մեծ է նրա ավանդը ոչ միայն գիտության, այլ նաև հանրակրթության ոլորտում, մասնավորապես` ուսուցիչների վերապատրաստման գործընթացում։

Սիրված և հարգված էր գիտակրթական, ուսուցչական և ուսանողական հանրույթներում։ Երեք որդիների օրինակելի հայր էր, հոգատար ամուսին, հասարակության մեջ ընդօրինակելի կերպար։

Արցախի Հանրապետության կրթության, գիտության, մշակույթի և սպորտի նախարարությունը իր խորին ցավակցությունն ու զորակցությունն է հայտնում սիրված մանկավարժի հարազատներին ու մտերիմներին։