«Ներկայացումը կստիպի հանդիսատեսին վերանայել իր կյանքը». կայացավ «Կարմա» ներկայացման պրեմիերան

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Կյանքում ամեն ինչ վերադառնում է, և ամեն ինչ ունի իր վերադարձի ճիշտ ժամը։ Դա է Կարմայի անխուսափելի օրենքը:

«Կարմա»-ն պատմություն է երեք տղամարդկանց մասին, որոնք հայտնվում են մութ իրականության կիզակետում, որտեղ ճշմարտությունն ու խաբեությունը խառնվում են իրար…

«Շունչ» թատրոնը երեկ՝ Ստանիսլավսկու անվան ռուսական դրամատիկական թատրոնում հանդիսատեսի դատին հանձնեց արդեն 5-րդ պրեմիերան:

Թատրոնի համահիմնադիր, դերասան Սամվել Դանիելյանի խոսքով՝ հոգեբանական դրաման կստիպի հանդիսատեսին մտածել իր քայլերի, ընտրությունների և դրանց հետևանքների մասին։

«Պիեսը գրել է Էդգար Կոստանդյանը: Ներկայացման ուղերձը կարող է հուշել հանդիսատեսին վերանայել իրենց կյանքը, յարաքանչյուր քայլ անելուց առաջ ծանր ու թեթև անել»,- Tert.am Life-ի հետ զրույցում, պրեմեիարայից առաջ ասաց Սամվել Դանիելյանը:

Ներկայացման ռեժիսորը Շուշան Ղազարյանն է, գլխավոր հերոսներին մարմնավորում են Սամվել Դանիելյանը, Սաշա Սուքիասյանն ու Սեյրան Մովսիսյանը:

Ներկայացման երգերի հեղինակը Արվին Քոչարյանն է, գործիքավորումն իրականացրել է Վահե Գրիգորյանը:

«Կարծում եմ, այս ներկայացումը մեր թատրոնի խաղացանկում իր ուրույն տեղը կզբաղեցնի և իր գույնով կտարբերվի մյուս ներկայացումներից: Փորձերի ընթացքը շատ խուճուճ էր, քանի որ ընթացքում գրվում էր պիեսը, քննարկում ու վերամշակում էինք: Մենք չունենք թատրոնի շենք և փորձերն իրականացրել ենք Երևանի մանկապատանեկան ստեղծագործության քաղաքային կենտրոնում, ուզում եմ շնորհակալություն հայտնել տարածքը տրամադրելու համար»,- մեզ հետ զրույցում նշեց դերասանը:

Սամվելի խոսքով՝ թատրոնի անձնակազմը համախմբված հաղթահարում է բոլոր մարտահրավերներն ու հավաքվում մեկ գաղափարի շուրջ:  

«Կարևորն ունենք մեկ նպատակ ու ոչինչ չի խանգարում այն իրագործել»,- ընդգծեց Սամվելը:  

Թեման շատ խոցելի է, ու թիմը վստահ է, որ պրեմիերայից հետո ներկայացումը շատ մեծ տարածում է ունենալու:

«Կարմա»-ն ռեժիսոր Շուշան Ղազարյանի 3-րդ համագործակցությունն է «Շունչ» թատրոնի հետ:

«Այս թատրոնն ունի մի լավ ավանդույթ, պիեսը գրվում է հատուկ նոր ներկայացման համար: Թեման ընտրում ենք, քննարկում ենք և դիմում դրամատուրգին: Այս թեման Էդգարին էլ շատ հետաքրքրեց ու սկսվեց համագործակցությունը: Այն չափազանց արդիական է ու ռեալիստական, պետք էր այդ իրական խոսքի մեջ ճիշտ չափն ու մատուցման ձևը գտնել: Դիմեցինք որոշակի հնարքների ու կարծում եմ, հանդիսատեսը ճիշտ կընկալի»,- նշեց Շուշան Ղազարյանը:

Ռեժիսորը հավելեց, որ կուզեր, որ «Շունչ» թատրոնը անկախ դժվարություններից միշտ  մնա ստեղծագործական նույն ոգով ու որևէ խոչընդոտ չխանգարի ստեղծագործել:

Պրեմիերայից հետո դերասան և պրոդյուսեր Սեյրան Մովսիսյանը Tert.am Life-ի հետ զրույցում անկեղծացավ, որ բավական բարդ էր ու պատասխանատու:

«3 տղամարդկանցով բեմում պահել հանդիսատեսին մի քիչ բարդ էր: Զգացմունքներն ու հույզերը խառնվել էր իրար, բայց շատ լավ անցավ պրեմիերան: Եվս մեկ անգամ «Շունչ» թատրոնն ապացուցեց, որ կարող է անել այն, ինչ ուզում է»,- նշեց Սեյրան Մովսիսյանը:

Հեղինակ՝ Անի Մնացականյան

Լուսանկարները՝ Ռոբերտ Աբրահամյանի

 Հետևեք մեզ՝ այստեղ