Հայտնիները՝ Վիրաբի նոր տեսահոլովակի շնորհանդեսին

BlogNews.am-ը գրում է.

Ռուսաստանաբնակ հայ երգիչ Վիրաբը հանրությանը ներկայացնում է իր նոր՝ «Սիրտս սիրահարվել է» երգի տեսահոլովակը։ «Yans» ակումբում երեկ կայացավ տեսահոլովակի համերգ-շնորհանդեսը։ BlogNews-ը ներկա է եղել երեկոյին և ներկայացնում է մանրամասները։

Երգի հեղինակն Արման Անտոնյանն է, գործիքավորումն արել է Էդգար Ալեքսանյանը, նվագակցել է Կարո Սարաֆյանը։ Տեսահոլովակի ռեժիսորը Արսեն Երեմյանն է, օպերատորը՝ Սուրեն Թադևոսյանը։

«Ես տեղյակ չեմ եղել այսօրվա միջոցառման մասին։ Ընկերներս ինձ հրավիրեցին Երևան, այսօր առավոտյան եկա, և անակնկալ մատուցեցին ինձ։ Ես շնորհանդես անելու նպատակ չունեի»,- ասաց երգիչն ու հույս հայտնեց, որ տեսահոլովակը դուր կգա հանրությանը։

Երգչի խոսքով՝ տեսահոլովակը նկարահանվել է Հայաստանում։ «Սա իմ չորրորդ տեսահոլովակն է «Ուր է նա», «Ես և դու», «Շոգ ա, շոգ ա» երգերից հետո։ Իմ բոլոր տեսահոլովակները միշտ նկարահանվել են Երևանում, քանի որ ես  շատ եմ սիրում իմ Երևանը։ Ինձ համար ուրախություն է Հայաստան գալը։ Նույնիսկ Երևան տեղափոխվելու մտադրություն ունեմ»,- ասաց երգիչն ու հավելեց, որ ինքը Ռուսաստանում աշխատում է հայերի համար, այդ իսկ պատճառով իր երգերի մեծ մասը հայերեն է։

Վիրաբի պրոդյուսեր, երգի հեղինակ Արման Անտոնյանն էլ նշեց, որ այս երգը նվիրել են իրենց շատ հարազատ զույգի։ «Հայաստանում քիչ են ճանաչում Վիրաբին, սակայն Ռուսաստանի հայության շրջանում նա բավականին պոպուլյար է։ Վիրաբը նպատակ ունի ավելի մեծ քայլեր անելու հայկական շոու բիզնեսում, այնպես որ առաջիկայում այստեղ էլ իրեն ավելի շատ կճանաչեն,- նշեց Արմանը։

Երեկոն վարում էր Վաչեն, ով նշեց, որ Վիրաբն իր լավ ընկերներից է․ «Ես իրեն վաղուց եմ ճանաչում, Ռուսաստանում բավականին հայտնի է, հանդիպել եմ տարբեր միջոցառումների ժամանակ։ Շատ տաղանդավոր, լավ երգիչ է, երգն էլ գեղեցիկ է։ Հայաստանում իրեն քչերն են ճանաչում, սակայն այս տեսահոլովակով փորձում է ներխուժել ասպարեզ»,- նշեց հումորիստը։

Դերասանուհի Ժաննա Բուտուլյանն էլ ասաց. «Շատ ռոմանտիկ, գեղեցիկ երգ է։ Վիրաբը շատ լավ, սրտաբաց մարդ է։ Ես մի քիչ այլ ոճի սիրահար եմ, սակայն հավանեցի այս երգը»։

Վիրաբի տեսահոլովակի համերգ-շնորհանդեսին ներկա լինելու համար Հայաստան էր ժամանել ռուս երգիչ և կոմպոզիտոր Ալեքսեյ Զարդինովը։ «Ես նախապես լսել էի երգը և ինձ շատ էր դուր եկել։ Այն շատ նուրբ է։ Ես ակնկալում էի, որ տեսահոլովակը կլինի շատ ռոմանտիկ, և չսխալվեցի։ Հրաշալի մտահղացում ուներ։ Մաղթում եմ Վիրաբին, որպեսզի կանգ չառնի։ Նա շատ յուրահատուկ, գեղեցիկ տեմբր ունի։ Երբ ես առաջին անգամ լսեցի նրան, ուզում էի շարունակ լսել ու լսել։ Իմ համերգներից մեկի ժամանակ Վիրաբը ելույթ ունեցավ, հանդիսատեսը նրան այնպես էր ծափահարում, ինչպես ոչ ոքի»,- ասաց նա։

Այս շնորհանդեսին ներկա լինելու համար Ղազախստանից էլ Հայաստան էր ժամանել Ֆարիզ Ֆորտունան։ «Ինձ շատ դուր եկավ տեսահոլովակը։ Երգի հեղինակն էլ իմ պրոդյուսերը՝ Արման Անտոնյանն է, շատ տպավորիչ էր։  Ես և Վիրաբը լավ ընկերներ ենք, չնայած տարբեր ազգերից ենք ու տարբեր երկրներում ենք ապրում։ Նրան մաղթում եմ մեծ հաջողություններ»,- նշեց երգիչը։

Դերասան Կարեն Ասլանյանն էլ նշեց, որ Վիրաբին վաղուց է ճանաչում։ «Ես լսել էի երգը, քանի որ հեղինակն իմ շատ լավ ընկեր Արման Անտոնյանն է։ Իսկապես շատ եմ հավանել, կատարումն էլ շատ լավն էր։ Տեսահոլովակն էր ինձ համար անակնկալ, շատ գեղեցիկ է ստացվել։ Առհասարակ, ես լսում եմ Վիրաբի երգերը ոչ միայն որպես ընկեր, այլև որպես երգիչ»,- ասաց նա։

                              

Նյութը՝ Ամալյա Հովհաննիսյանի

Լուսանկարները՝ Կարեն Հովհաննիսյանի