Կառավարությունը նախատեսում է «Շիրակ» օդանավակայան ներգրավել բյուջետային ավիափոխադրողների

ՀՀ կառավարությունը նախատեսում է ակտիվացնել Գյումրիի «Շիրակ» օդանավակայանի գործունեությունը` բյուջետային ավիափոխադրողների ներգրավման միջոցով:

Այդ մասին կառավարության արտահերթ նիստից հետո լրագրողների հետ զրույցում նշեց ՀՀ քաղացիական ավիացիայի գլխավոր վարչության պետ Սերգեյ Ավետիսյանը` անդրադառնալով գործադիրի ծրագրին, որը ներկայացվել է Ազգային ժողովի հաստատմանը:

«Նախատեսվում է պարզեցնել ընթացակարգերը և գործընթացները` ավիաընկերություններին հայաստանյան շուկայում գործունեություն ծավալելու թույլտվության ուղղությամբ»,-  ասաց Ավետիսյանը:

Հարցին` այդ քայլերը կարո՞ղ են նպաստել ավիատոմսերի գների նվազմանը, Քաղավիացիայի գլխավոր վարչության պետը նշեց. «Կարծում եմ՝ անուղղակի ձևով այո: Նոր ավիաընկերությունների ներգրավման շնորհիվ  այդ ամենը կբերի մրցակցության բարձրացմանը, ինչն էլ կնպաստի ավիատոմսերի գների նվազմանը»:

Մյուս հարցին` իսկ ուղղակիորեն այդ խնդիրն իրենց առջև դրվա՞ծ է, Ավետիսյանը պատասխանեց. «Իհարկե»: