ՀՀ նախագահը պարգեւատրեց ՏՏ ոլորտի լավագույն աշակերտներին եւ ուսանողներին

ՀՀ նախագահ Սերժ Սարգսյանը հոկտեմբերի 19-ին նախագահական նստավայրում պարգեւատրեց ՏՏ բնագավառում լավագույն ցուցանիշներ արձանագրած ուսանողներին ու աշակերտներին:

«Արմենպրես»-ի փոխանցմամբ` «ՏՏ բնագավառում ՀՀ նախագահի ամենամյա կրթական պարգեւ»-ին արժանացան 28 լավագույն ուսանող ու 15 աշակերտ` 5 բուհից եւ 8 ավագ դպրոցից:

Շնորհավորելով մրցանակակիրներին՝ Նախագահ Սերժ Սարգսյանը նշեց, որ պարգեւներ հանձնելը նախագահի հաճելի պարտականություններից մեկն է: «Տեղեկատվական տեխնոլոգիաների ոլորտը Հայաստանի համար կարեւոր եւ հեղինակային է: Վաղվա Հայաստանը պետք է լինի ավելի կրթված, բանիմաց ու ստեղծագործ քաղաքացիների ձեռքում»,-ասաց Սերժ Սարգսյանը՝ մրցանակակիրներին կոչ անելով լինել նախաձեռնող, համարձակ եւ համառ կրթության մեջ:

«Սինոփսիս Արմենիա» ընկերության գործադիր տնօրեն Հովիկ Մուսայելյանը լրագրողների հետ ճեպազրույցում կարեւորեց ավագ դպրոցներում անցկացվող պիլոտային ծրագիրը, որով հանրապետության արդեն 10 ավագ դպրոցներում որպես պարտադիր առարկաներ ներառվել են  «Միկրոէլեկտրոնիկա», «ՏՏ» և «Հեռահաղորդակցության հիմունքներ» առարկաները: «Կարծում եմ, մինչեւ 2025 թվականը այս ծրագիրը կգործի հանրապետության բոլոր ավագ դպրոցներում: Այս ամենի արդյունքում մենք կունենանք որակյալ կադրեր աշխատաշուկայում», -ասաց նա:

«Սինոփսիսի» նախագահ և գլխավոր օպերացիոն տնօրեն դոկտոր Չի-Ֆուն Չանի խոսքով` Հայաստանում տեղեկատվական տեխնոլոգիաների ոլորտը շարունակում է մնալ ամենակարեւորներից մեկը: «ՏՏ ոլորտում կրթության համար կարեւորում եմ  մեր ընկերության դերը Հայաստանում»,-հավելեց Չի-Ֆուն Չանը:

ՏՏ բնագավառում ՀՀ նախագահի ամենամյա կրթական պարգեւը հիմնվել է ՀՀ նախագահի 2005 թվականի հունիսի 2-ի կարգադրությամբ: Նախագահի կրթական պարգեւը շնորհվում է ամեն տարի բարձր առաջադիմություն ունեցող այն ուսանողներին եւ աշակերտներին, ովքեր ակտիվորեն մասնակցում են ՏՏ բնագավառի եւ բնական գիտությունների տարբեր օլիմպիադաների եւ մրցույթների, գիտական հոդվածների հեղինակներ են, ունեն բազմակողմանի գիտելիքներ եւ տաղանդներ, ինչպես նաեւ ներգրավված են հասարակական ծրագրերում: