Ծիրանի ջեմը և քաղաքական պայքարը ՀՀ-ում

Վերածնունդ ապրող ՕԵԿ-ը շարունակում է զարմացնել իր նորանոր նվաճումներով։ Պարզվում է՝ վերածնվածները հիմա էլ Քաղաքական դպրոց կբացեն։ Ընդհանրապես քաղաքական դպրոցները բավական տարածված երևույթ են արևմտյան զարգացած երկրներում, թերևս նրանց փորձից ելնելով էլ ՀՀԿ-ն նույնպես բացում է իր քաղաքական դպրոցը։ ԲայցՕԵԿ-ի Քաղաքական դպրոցը, համաձայնենք, դարակազմիկ իրողություն կարող է դառնալ։ Հայաստանյան քաղաքական դաշտում տասնամյակների փորձ ունեցող, քաղաքական  սկզբունքայնության էտալոն հանդիսացող այս կուսակցությունը թվում է՝ վաղուց պետք է իր դպրոցը բացած լիներ, որպեսզի արտահաներ իր ներքին պոտենցյալը։

Հասկանալի է, որ  վերածնված ՕԵԿ-ի քաղաքական դպրոցում առաջնային դիրքեր են ունենալու այնպիսի առարկաներ ու դասընթացներ, ինչպիսիք են հետևյալ վերտառություններով կուրսերը՝ «Ինչպես քցել քաղաքական դաշնակիցներին՝ խորացված դասընթաց », « Ծիրանի ջեմը և քաղաքական պայքարը ՀՀ-ում», «Բուդդիզմը և  կուսակցությունը, ինչպես վերածնել նեխած քաղաքական ուժը»։

Մենք, անշուշտ, չենք կարող մեկ դիտարկման սահմաներում անդրադառնալ այն գլոբալ փոխություններին, որոնք իր հետ բերելու է «Հայկական վերածննդի» քաղաքական դպրոցը, իսկ եթե ավելի լուրջ, ապա ընդամենը կարող ենք փաստել, որ հայաստանյան հասարակությունը վերածվել է տարատեսակ պատուհասների փորձադաշտի, որին անհասկանալի իմունիտետով դեռևս կարողանում է դիմադրել։ Այս մասին են վկայում ՕԵԿ-ՀՎԿ այսպես կոչված կուսակցության գոյությունը, որը, ինչպես ցույց տվեցին անցած ՏԻՄ ընտրությունները, լիովին շանսեր ունի ապագա խորհրդարանում իր «պատվավոր» տեղն ունենալու համար։