ԵՀԽ Հայաստանյան Կլոր տարեկան հիմնադրամն իրականացրել է մոտ 80 ծրագիր

 Մայր Աթոռ Սուրբ Էջմիածնում գումարվեց Եկեղեցիների համաշխարհային խորհրդի (ԵՀԽ) Հայաստանյան Կլոր սեղան հիմնադրամի (Կլոր սեղան հիմնադրամ-ՀԿՍ) տարեկան ժողովը:  Ինչպես«Արմենպրես»-ին տեղեկացրին ԵՀԽ Հայաստանյան Կլոր սեղան հիմնադրամից, մասնակցում էին ՀԿՍ գործընկեր կազմակերպությունները, թեմերի առաջնորդներ, սոցիալակա ն կենտրոնների աշխատակիցներ, ՀԿՍ աշխատակազմը: Հիմնադրամի հոգաբարձուների խորհրդի նախագահ Տ. Մկրտիչ եպիսկոպոս Պռոշյանի բացման խոսքից հետո «Սպառողների ասոցիացիա» ՀԿ նախագահ Արմեն Պողոսյանը ներկայացրեց Հայաստանում սպառողների իրավունքների վիճակը, կազմակերպության գործունեությունը:

Այնուհետև Կլոր սեղան հիմնադրամի գործադիր տնօրեն Կարեն Նազարյանը ներկայացրեց կառույցի 2015-2016 թթ. Գործունեությունը և 2017 թ. ծրագիրը: Տնօրենի խոսքով` ՀԿՍ գործունեությունը կենտրոնացած է եղել հիմնականում 4 ուղղությամբ` համապարփակ համայնքային զարգացում, կարողությունների զարգացում, խաղաղություն և հաշտեցում, ինչպես նաև` արտակարգ իրավիճակներ:

Համապարփակ համայնքային զարգացման շրջանակում 2015 թ. Շիրակի, Գեղարքունիքի, Կոտայքի, Արագածոտնի,  Արմավիրի, Վայոց Ձորի և Լոռու մարզերում իրականացվել է 14 ծրագիր: Ուղղակի շահառուների թիվն անցել է 10.000-ից: Ծրագրերի մասնակիցների 60 տոկոսից ավելին եղել են կանայք: Ծրագրերը ներառել են նշված մարզերում գործող սոցիալական կենտրոններում կազմակերպված հատուկ դասընթացներ, որոնց ընթացքում մասնակիցները ստացել են համակարգչային գիտելիք, հագուստի մոդելավորման, ձեռագործ աշխատանքի, կարպետագործության, դիմահարդարման, կահույքի պատրաստման, սեղանի ձևավորման և այլ գործնական հմտություններ: Ձեռք բերած գիտելիքի շնորհիվ ընդլայնվել ե մասնակիցների ինքնազբաղվածության հնարավորությունները և բարձրացել է մրցունակությունն աշխատաշուկայում: ՀԿՍ 12 նախագիծ մասնակցել է «Բերքի տոն» 2016թ. փառատոնին:

Շիրակի, Կոտայքի, Արագածոտնի, Լոռու, Արմավիրի մարզերի համայնքներում կազմակերպվել է բնապահպանական խնդիրներին նվիրված 15 աշխատանքային հանդիպում: Դրանք հիմք կծառայեն քաղաքացիական հասարակության մոբիլիզացմանը և հետագայում բնապահպանական խնդիրների լուծման համար հատուկ հիմնադրամների ստեղծմանը:

Համայնքներում շարունակվել է նաև եկեղեցու դերը սոցիալական աշխատանքում բարելավելուն և զարգացնելուն ուղղված գործունեությունը:

Գենդերային անհավասարության, սեռով պայմանավորված` հղիության արհեստական ընդհատման և բռնությունների դեմ պայքարի, ինչպես նաև քրիստոնեական և ընտանեկան արժեքների տարածման  շրջանակում ՀԿՍ հիմնադրամը շարունակել է զարգացնել թեմերի հոգևորականների և Հայ առաքելական եկեղեցու քրիստոնյա դաստիարակության կենտրոնի դասընթացավարների կարողությունները, որոնք հետագայում համայնքների երիտասադրության շրջանում իրականացրել են իրազեկության բարձրացմանը նվիրված հանդիպումներ և քննարկումներ:

Շարունակվել է նաև ՀԱԵ Արարատյան հայրապետական թեմի Ցերեկային կենտրոնին տրամադրվող աջակցությունը, որի շրջանակում ՄԻԱՎ-ով ապրող մարդկանց և նրանց ընտանիքներին տրամադրվել է սոցիալ-հոգեբանական աջակցություն: Ընդհանուր առմամբ` ամսական մոտ 80 անձ օգտվել է ցերեկային կենտրոնի ծառայություններից:

Շարունակվել է նաև արտակարգ իրավիճակների ժամանակ պատրաստվածության և առաջին օգնության տրամադրման ծրագիրը: 21 սիրիահայ անցել է Մայկրոսոֆթի կազմակերպած ծրագրավորման դասընթացները, նրանցից 12-ն աշխատանքի է անցել ՏՏ ոլորտի ընկերություններում: 50 սիրիահայ մասնակցել է հագուստի մոդելավորման, կարի, դիմահարդարման, վարսահարդարման, սեղանների ձևավորման, թխվածքների պատրաստման և ձևավորման դասընթացներին: Մասնակիցներից 15-ը ստացել է նաև համապատասխան գործիքներ: Բոլոր մասնակիցներն արդյունքում գտել են աշխատանք:   1500 սիրիահայի տրամադրվել է հոգևոր և սոցիալ-հոգեբանական աջակցություն: 2200 շահառու ստացել է մարդասիրական, հոգևոր և սոցիալ-հոգեբանական օժանդակություն:

ԵՀԽ Հայաստանյան կլոր սեղան հիմնադրամը, «Եկեղեցիների համատեղ գործողություն» դաշինքի հայաստանյան ֆորումի  շրջանակում Արցախ է հասցրել Լեռնային Ղարաբաղի դեմ Ադրբեջանի կողմից սանձազերծված ապրիլյան պատերազմի օրերին հավաքված մարդասիրական օգնությունը: Օգնության փաթեթները ներառել են առաջին անհրաժեշտության սննդամթերք և հիգիենայի պարագաներ: Օգնություն է ստացել Հայաստանում և Արցախում գտնվող 1200-ից ավելի տուժած: Ծրագիրն իրականացվել է Հայ առաքելական եկեղեցու սոցիալական ծառայության կենտրոնի հետ համատեղ:

 Կարողությունների զարգացման ծրագրի շրջանակում ՀԿՍ հիմնադրամը շարունակել է զարգացնել սեփական աշխատակազմի, սոցիալական կենտրոնների և ՀԱԵ թեմերի հոգևորականների կարողությունները` ծրագրերի կառավարման, սոցիալական ծառայությունների, սոցիալ-հոգեբանական աջակցության տրամադրման ոլորտներում:  

Խաղաղության և հաշտեցման ծրագրի շրջանակում Հայ-ռուսական (Սլավոնական) համալսարանի ուսանողների համար մշակվել և իրականացվել է «Հակամարտությունների ձևափոխումը և լուծումը` բանակցության միջոցով» դասընթացը, որին մասնակցել է մոտ 30 ուսանող: Հարևանների հետ խաղաղ և առանց բռնության գոյակցության թեմայով մանկական նկարների մրցույթին մասնակցել է Հայաստանի 8 մարզի 165 աշակերտ: Մոտ 200 ուսանող Երևանում և մարզերում մասնակցել է խաղաղության թեմային նվիրված և բուհերի համար անցկացված դասընթաց-դասախոսություններին:

Հանդիպման եզրափակիչ մասի ընթացքում ՀԿՍ հիմնադրամի գլխավոր հաշվապահ Էլմիրա Մադոյանը տեղեկացրեց, որ 2014-2016թթ. Հիմնադրամն իրականացրել է մոտ 80 մշտական և ժամանակավոր ծրագիր: Ընդհանուր առմամբ ծրագրերի իրականացման համար նշված ժամանակահատվածում ծախսվել է 482 մլն. դրամից ավելի, իրականացնող գործընկեր կազմակերպությունների ներդրումը եղել է  ավելի քան 190 մլն.  դրամ: Ծրագրերն իրականացվել են ՀԿՍ հիմնադրամի դոնոր` միջազգային և միջեկեղեցական կազմակերպությունները:

ՀԿՍ համապարփակ համայնքային զարգացման ծրագրերի համակարգող Կարինե Բաղդասարյանը ներկայացրեց Եկեղեցիների համաշխարհային խորհրդի Շահերի պաշտպանության էկումենիկ դաշինքի համակարգող էկումենիկ Մանոջի հեղինակած` «Սննդի 10 պատվիրանները» աշխատությունը և սննդի անվտանգությանը վերաբերող ժամանակակից մարտահրավերները:  

ԵՀԽ Հայաստանյան Կլոր սեղան հիմնադրամի տարեկան ժողովը եզրափակվեց Հայ առաքելական եկեղեցու Տավուշի թեմի առաջնորդ Տ. Բագրատ Եպիսկոպոս Գալստանյանի օրհնության խոսքով և աղոթքով: