Հայաստանը պետք է դատապարտի ռուսական ագրեսիան. Ուկրաինայի Ռադայի կոչը ՀՀ իշխանություններին

Գերագույն ռադայում նախօրեին հնչել են հակահայկական քննադատություններ այն բանից հետո, երբ առաջարկվել է ընդունել Հայ կաթոլիկ եկեղեցու կազմալուծման 70-ամյակը հոկտեմբերի 25-ին հիշատակելու մասին որոշում։ Որոշումն ի վերջո ընդունվել է, սակայն ոչ առանց սկանդալի։ Ի սկզբանե փաստաթղթին կողմ է քվեարկել միայն 218 պատգամավոր՝ անհրաժեշտ 226-ի փոխարեն։ Նախագծին դեմ է եղել «Ռադիկալ կուսակցության» նախագահ Օլեգ Լյաշկոն։

«Մեր հայ եղբայրների նկատմամբ ունեցած հարգանքով հանդերձ՝ պետք է նշեմ, որ Հայաստանը ճանաչել է Ղրիմի բռնազավթումը և չի աջակցել Ուկրաինայի տարածքային ամբողջականությանը և ինքնիշխանությանը։ Խնդրում եմ գործընկերներիս հիշել այդ մասին։

Օգտվելով առիթից՝ դիմում եմ հայերին և Հայաստանի իշխանություններին Ռուսաստանի կողմից Ղրիմի բռնազավթումը դատապարտելու, Ուկրաինայի տարածքային ամբողջականությունը ընդունելու և ռուսական ագրեսիայի դեմ մեր պայքարին աջակցելու պահանջով»,- ասել է ուկրաինացի քաղաքական գործիչը։

Իրավիճակը փորձել է շտկել Ռադայի փոխնախագահ Իրինա Գերաշչենկոն, որը կոչ է արել տարանջատել պետական և եկեղեցական գործերը։

Օրինագիծը ներկայացրած Նիկոլայ Կնյաժիցկին իր հերթին հայտարարել է, որ 1946թ․ ԽՍՀՄ ներքին գործերի ժողովրդական կոմիտեի ձեռքով մահացած հայերը կապ չունեն ժամանակակից հայկական պետության հետ։

Վերոնշյալ հայտարարություններից հետո Լյաշկոն ևս մեկ անգամ հնչեցրել է իր պահանջները՝ կոչ անելով որոշման նախագծում ավելացնել կետ, համաձայն որի՝ Հայաստանը պետք է դատապարտի ռուսական ագրեսիան և աջակցի ուկրաինացիներին։

«Հայաստանը նույն կերպ տանջվում է ռուսական ագրեսիայից՝ այնպես, ինչպես Ուկրաինան։ Եվ մենք պետք է միավորենք մեր ջանքերը, ոչ թե պառակտենք»,- կոչ է արել Լյաշկոն։

Ռուսաստանում արգելված՝ «Ղրիմի թաթարների մեջլիս»-ի նախագահ Ռեֆաթ Չուբարովն իր հերթին ընդունել է, որ Լյաշկոն իրավացի է, այնուամենայնիվ, գործընկերներին կոչ է արել աջակցել որոշման ընդունմանը, քանի որ իրադարձությունները տեղի են ունեցել Ուկրաինայի տարածքում և որևէ կապ չունեն ներկայիս Հայաստանի հետ: