Սեր առաջին հայացքից. արդյո՞ք այն գոյություն ունի

Այն հարցի շուրջ, արդյո՞ք գոյություն ունի սեր առաջին հայացքից, տարբեր կարծիքներ կան: Շատեր համոզված են, որ սեր առաջին հայացքից չի լինում։ Ռոմանտիկները հակառակն են պնդում։ Պարզ չէ, թե ինչպես կարող է սովորական հայացքն ու շարժումը մարդուն թույլ տալ, որ մեկընդմիշտ սիրահարվի։ Բայց մենք բոլորս սեր ուզում ենք, այդ պատճառով հաճախ այն շփոթում ենք սովորական համակրանքի հետ: Դուք հետաքրքիր մարդու հետ եք ծանոթացել, նա ձեզ դուր է եկել, սկսել եք շփվել, հանդիպել եւ աստիճանաբար սկսել եք նրա նկատմամբ սիրահարվածություն ու համակրանք տածել…

 

Անծանոթ մարդու հանդիպելիս, ով նման չէ ձեր ծանոթներին, ով հետաքրքիր է, ուրախ ու բարեկիրթ, մենք փորձում ենք նրա հետ շատ ժամանակ անցկացնել, որպեսզի ավելի լավ ճանաչենք նրան ու հասկանանք։ Այդ շփումը սովորություն է դառնում, եւ երբ նա մեր կողքին չէ, սկսում ենք կարոտել։ Արդյունքում սիրահարվում ենք նրան՝ այդ քիչ ծանոթ մարդուն, ում հետ ընդամենը մի քանի օր առաջ ենք հանդիպել։ Մեզ նոր զգացողություններ են պատում, մտորումներ, զգացմունքներ, աշխարհն ավելի վառ ու գունավոր է դառնում եւ մենք կյանքը, կարծես, նորովի ենք սկսում։

Այդ պահերին կարող եք վստահ լինել, որ այդ պարզ զվարճանք չէ կամ ձանձրույթի դեմ դեղամիջոց։ Կարճ զգացմունք։ Արդյո՞ք սեր է, գուցե պարզապես սիրահարվածությո՞ւն եւ շատ արագ կանցնի… Ոչ ոք ձեզ երաշխիք չի կարող տալ։ Միայն ինքներդ կարող եք հասկանալ այդ, եթե բացահայտեք, թե ձեզ համար ով է այդ մարդը։ Այս հարցում պետք չէ շտապել, առավել եւս՝ պարզ ընկերություն առաջարկել, երբ այդ մարդը ձեր նկատմամբ կապվածություն է զգում։ Դուք պետք է հասկանաք, թե ինչ եք զգում նրա նկատմամբ, հետո արդեն որոշում կայացնեք. ընկերներ մնալ, թե՞ իրական սեր զգալ։ Միշտ ավելի դյուրին է հարաբերություններն ընկերական դարձնելը, սակայն հետո ավելի խորը, պատասխան զգացմունքներով փոխարինելն ավելի բարդ է լինում։

Հարց է, թե ինչո՞ւ է մարդկանց մեծամասնությունը վախենում արտասանել այդ սեր բառը։ Խոսքը հարաբերությունների սկզբնական շրջանի մասին է։ Ծանոթությունից մի քանի օր հետո դուք պատրաստ եք ամբողջ աշխարհով մեկ բղավել ձեր սիրո մասին ու, գլխավորը, չեք վախենում նրան ասել ձեր սիրո մասին։ Սակայն, ի պատասխան, ձեր սիրո առարկան չի շտապում նման խոստովանություն անել։ Իսկ հետո՞։ Ամեն ինչ ավարտվա՞ծ է։ Իհարկե՝ ոչ, մի շտապեք։ Հիշեք, չէ՞ որ ձեզ լուրջ հարաբերություններ են հարկավոր, թեթեւ սիրախաղը ձեզ չի հետաքրքրում եւ հենց այնպես մեկի հետ ապրելը նույնպես ձեր ընտրությունը չէ։ Հազվադեպ է սերը տարերային լինում։ Մարդիկ (հատկապես տղամարդիկ) երկար են հետեւում իրենց զուգընկերոջը, ուսումնասիրում են, վերլուծում եւ միայն որոշ ժամանակ անց, երբ լիովին վստահում են ձեզ եւ իրենց զգացմունքներին, ձեզ սեր են խոստովանում։

Այդ պատճառով, եթե ծանոթությունից մի քանի օր հետո դուք խորը զգացմունքներ ունեք եւ վստահ եք, որ արդեն սիրում եք, որ նա հենց այն մարդն է, ում հետ պատրաստ եք ընտանիք կազմել, մի շտապեք խոստովանել, դուք կարող եք վախեցնել նրան։ Հնարավոր է՝ նա մտածի, թե դուք շատ անկայուն եք, եւ ձեր հապճեպ սիրահարվածությունը կարող է արագ անցնել։ Դուք պետք է ձեր զուգընկերոջը ժամանակ տրամադրեք, որպեսզի նա կարողանա ձեր նկատմամբ ունեցած զգացմունքների հարցում կողմնորոշվել։ Եթե վստահ եք ձեր զգացմունքներում, ուրեմն պետք չէ վախենալ, որ ձեր սիրահարվածությունը կանցնի եւ ամեն ինչ կավարտվի։

Հնարավոր է՝ գոյություն ունի սեր առաջին հայացքից, բայց արդյո՞ք այն երկար ու հարատեւ կլինի… Հնարավոր է, որ ստուգված զգացմունքներն օգնեն պահպանել ձեր սերը երկար տարիներ։