Լճաշենում պետական ծրագրով ջրարբիացվել է մոտ 2 հազար հեկտար արոտ

Գեղարքունիքի մարզի Լճաշեն գյուղում ՀՀ կառավարության կողմից իրականացվող «Գյուղատնտեսական ռեսուրսների կառավարման եւ մրցունակության ծրագրի» շրջանակներում կառուցվել եւ շահագործվել է 4,6 կիլոմետր երկարության ջրատար, օրվա կարգավորիչ երկու ջրամբար եւ 2 խմոց, ինչի արդյունքում ջրարբիացվել է մոտ 2 հազար հեկտար արոտավայր: Ինչպես Արմենպրեսին ներկայացրեց ՀՀ Գյուղատնտեսության նախարարության «Գյուղատնտեսական ծրագրերի իրականացման գրասենյակ» պետական հիմնարկի Գեղարքունիքի մարզի համակարգող Խորեն Բադալյանը, նույն ծրագրի շրջանակներում Լճաշենի գյուղատնտեսական նորաստեղծ կոոպերատիվը ձեռք է բերել 2 նորագույն անվավոր տրակտոր, 2 հակավորող մեխանիզմ, 1 շարքացան: «Ծրագիրը Լճաշենում դեռ ընթացքի մեջ է, եւ 2017 թվականին կոոպերատիվը ձեռք կբերի նոր գյուղմեխանիզմներ՝ 2  փոցխ, 2 գութան, 1 ավտոմեքենա, 1 կուլտիվատոր: Ծրագրի արժեքը: Պետական ներդրումը ու համայնքի կողմից կատարված համաֆինանսավորումը միասին կազմում են 170 միլիոն դրամ: 98 միլիոն դրամ ծախսվել է ջրարբիացման համակարգի կառուցման, 72 միլիոն դրամը՝ գյուղտեխնիկայի ձեռքբերման համար: Գյուղտեխնիկան համայնքի կոոպետարտիվը ձեռք է բերել այս աշնան սկզբներին, իսկ ջրարբիացման համակարգը շահագործվել է մոտ 10 օր առաջ: Սա կարեւոր քայլ է լինելու Լճաշենի գյուղատնտեսության զարգացման համար»,-ներկայացրեց Խորեն Բադալյանը:

Իր հերթին Լճաշենի գյուղապետ Կորյուն Մարգարյանը կենսական ու հույժ անհրաժեշտ որակեց գյուղի համար նոր գյուղտեխնիկայի ձեռքբերումը եւ արոտների ջրարբիացումը: «Մեր համայնքում իմ աշխատած 17 տարիների ընթացքում պետության կամ այլ կազմակերպությունների կողմից իրականացվել են սոցիալ-տնտեսական նշանակության  բազմաթիվ ու բազմատեսակ ծրագրեր, սակայն այս ծրագիրն իր կարեւորությամբ ու նշանակությամբ շատ ավելի օգտավետ եւ կենսական գյուղի գրեթե  բոլոր տնտեսությունների համար: Արդեն խոտհնձի ավարտին աշխատեցրել ենք հակավորող մեխանիզմները եւ համոզվ ել, որ դրանց աշխատանքով նկատելիորեն նվազում են մինչ այժմ սահմանված գները, իսկ եկող արոտի սկզբից արդեն մեր անասունները կարածեն ջրարբիացված արոտներում, ինչի արդյունքում էապես կբարձրանա մեր անասնագլխաքանակի մթերատվությունը, կզարգանա անասնապահությունը: Մեր համայնքն իր շնորհակալությունն է հայտնում հայրենի կառավարությունից»,- նշեց գյուղապետը:

 Խոսրով Խլղաթյան