Ջուլիեն Կիզան Հայաստանում ներկայացրել է շվեյցարական ճարտարապետական դպրոցի կոնցեպտները

Ալեքսանդր Թամանյանի անվան Ճարտարապետության ազգային թանգարան-ինստիտուտում կայացել է շվեյցարացի ճարտարապետ Ջուլիեն Կիզայի` «Մենդրիսիոյի ճարտարապետական ակադեմիա՝ բացառիկ հայացք ճարտարապետությանը» թեմայով դասախոսությունը, որի ժամանակ բանախոսը ապագա ճարտարապետներին ներկայացրել է շվեյցարական ճարտարապետական դպրոցի նոր կոնցեպտները:

Ինչպես «Արմենպրես»-ին տեղեկացրին ՀՀ կառավարությանն առընթեր քաղաքաշինության պետական կոմիտեից, դասախոսությունը, որին ներկա է գտնվել ՀՀ-ում Շվեյցարիայի արտակարգ և լիազոր դեսպան Լուկաս Գասսերը, կազմակերպվել է Հայաստանի Հանրապետության ԿԱ քաղաքաշինության պետական կոմիտեի, Հայաստանում Շվեյցարիայի դեսպանատան, Ալ.Թամանյանի անվան ճարտարապետության ազգային թանգարան-ինստիտուտի և Ճարտարապետության և Շինարարության Հայաստանի ազգային համալսարանի նախաձեռնությամբ:

Դեսպան Գասսերը, ողջունելով ներկաներին նշել է, որ այս հանդիպումը կարևոր դերակատարություն կարող է ունենալ ապագայում հայ և շվեդ ճարտարապետների համագործակցության համար: Ջուլիեն Կիզան պարզ ճարտարապետության ջատագովը լինելով` ներկայացրել է  շվեյցարական ճարտարապետական դպրոցի հիմնադրույթները, նշելով, որ ինքը նախընտրում է կենտրոնանալ այն հիմքերի վրա, որոնք առաջնորդում են ցանկացած նախագիծ դեպի հստակ ուղղություն:

Հանդիպման ավարտին ՀՀ-ում Շվեյցարիայի արտակարգ և լիազոր դեսպան Լուկաս Գասսերը հանդիպում-առանձնազրույց է ունեցել ո ՀՀ ԿԱ քաղաքաշինության պետական կոմիտեի նախագահ Նարեկ Սարգսյանի հետ: Կողմերը քննարկել են երկուստեք հետաքրքրություն ներկայացնող հարցեր: