Ավստրալիայում ճարպակալումից տառապող քույրերը 1 տարում նիհարել են 167 կգ-ով (լուսանկարներ)

Tert.am-ը գրում է.

Ավստրալական Մոնտերեյ քաղաքում բնակվող Անաբել և Անաստասիա Չիարելոները, որոնք տառապում էին գերճարպակալումից, 1 տարում նիհարել են 167 կգ-ով, գրում է The Daily Mail-ը՝ մանրամասնելով, որ քույրերին հաջողվել է զգալի քաշ գցել ստամոքսի փոքրացման վիրահատության իրականացումից հետո:

Տասնվեցամյա Անաբելն ու 24-ամյա Անաստասիան պատմել են, որ ամբողջ կյանքում ունեցել են մեծ ախորժակ՝ հիմնականում սնվելով մեծ քանակությամբ պաստայով, հացով ու շոկոլադով, ինչն էլ հանգեցրել է ավելորդ քաշի հավաքմանը:

Անաբելի խոսքով՝ 13 տարեկանում ինքը կշռել է 248 կգ: Բժիշկները նախազգուշացրել էին, որ անհապաղ քաշ չկորցնելու դեպքում աղջիկը կմահանա: Մասնագետները նաև խորհուրդ էին տվել ստամոքսի փոքրացման վիրահատություն իրականացնել:

Կրտսեր քրոջն աջակցելու և վիրահատության հետ կապված նրա վախերը ցրելու համար Անաստասիան, որն այդ պահին կշռում էր 168 կգ, որոշել է ևս պառկել վիրահատական սեղանին ու փոքրացնել ստամոքսը:

Վիրահատությունները տվել են ցանկալի արդյունքն ու այժմ քույրերն ուրախությամբ պատմում եմ, որ միասին կորցրել են 167 կգ ավելորդ քաշ:

«Երբ բժիշկս ասաց, որ պետք է վիրահատվեմ, շատ վախեցա, քանի որ այդ ժամանակ ընդամենը 13 տարեկան էի: Բայց, երբ Անաստասիան ասաց, որ առաջինն ինքը կվիրահատվի, ես հանգստացա ու սկսեցի ավելի ինքնավստահ զգալ: Շնորհակալ եմ նրան ինձ ձեռք մեկնելու համար»,-պատմել է Անաբելը:

Քույրերը նաև նշել են, որ իրենց ընտանիքում բոլորը շատակեր են, ուստի՝ բնական է, որ իրենք ևս փոքրուց անտարբեր չեն եղել ուտելիքի հանդեպ և երբեք չեն իմացել, թե ինչ ասել է քաղցած լինել:

«Ես մի քանի անգամ փորձել եմ դիետա պահել, սակայն կամքի ուժ չեմ ունեցել ուտելիքներից հրաժարվելու համար: Ես հասկացա, որ վիրահատության դիմելը կարող է փրկության միակ միջոցը լինել»,-հավելել է Անաբելը:

Հայտնի է, որ այժմ Անաստասիան նիհարել է 77 կգ-ով, իսկ նրա քույրը՝ 90կգ-ով: Քույրերը չեն պատրաստվում բավարարվել ձեռք բերածով ու մտադիր են էլի քաշ կորցնել: