Ադրբեջանում գնչուները խուսափում են զինծառայությունից

Ադրբեջանում ոչ բոլոր ազգային փոքրամասնություններին է հաջողվում խուսափել զինծառայությունից, սակայն դա հեշտությամբ հաջողվում է գնչուներին, որոնք զանգվածաբար հրաժարվում են ծառայել ադրբեջանական բանակում:

«Ազադլըգ» թերթը գրում է, որ  Ադրբեջանի մայրաքաղաք Բաքվի բոլոր փողոցներում, մետրոյի կայարանների ելքերում կարելի է հանդիպել այդտեղի մշտական բնակիչների վերածված գնչուների, որոնք հանրապետության տարբեր շրջաններից Բաքու են ժամանել ապրուստի միջոց վաստակելու համար: Նրանք վազում են անցորդների հետեւից եւ փող մուրում:

Գնչուների` Ադրբեջանում գրանցում ունենալ-չունենալու մասին հարցին Բաքվի ոստիկանության գլխավոր վարչության հասարակայնության հետ կապերի բաժնի պետ Գալիբ Ռահիմովը modern.az-ին հայտնել է, որ գնչուների հետ կապված հարցերը, մեծ հաշվով, անորոշ են, քանի որ ստուգումների ժամանակ նրանք չեն ցանկանում որեւէ փաստաթուղթ ցույց տալ:«Բանը նրանում է, որ իրավապահ մարմինների կողմից կանգնեցվելու դեպքում պատժից խուսափելու համար գնչուներն ինքնության փաստաթուղթ չեն ներկայացնում: Գնչուներ բնակվում են Ադրբեջանի տարբեր շրջաններում, սակայն ամենաշատը` Եվլախում: Այդտեղ նրանք անգամ իրենց թաղամասն ունեն: Այդ պատճառով, Բաքվում խնդիրներ ունեցող գնչուներին իրավապահներն անմիջապես արտաքսում են Եվլախ` նրանցով այնտեղ զբաղվելու համար», -ասել է նա:

Գալիբ Ռահիմովը նաեւ հայտնել է, որ չնայած այն բանին, որ գնչուները գրանցված են իրենց բնակության վայրերում, նրանք թաքցնում  են փաստաթղթերը, որպեսզի խուսափեն զինծառայությունից:

Ադրբեջանում 2015 թվականին զինծառայությունից խուսափող ադրբեջանցիների թիվը, 2014 թվականի համեմատ, 2,5 անգամ աճել է: AzVizion.az կայքը, հենվելով Ադրբեջանի պետվիճկոմի տվյալների վրա` հայտնել է, որ այս տարի զինծառայությունից խուսափողների թիվը կազմել է 216, որոնցից 190-ը զինծառայության դեմ հանցագործություն են գործել:Ադրբեջանի պետվիճկոմի տվյալներով, անցյալ տարի Ադրբեջանում զինծառայությունից խուսափել են 84 հոգի: