Առաջարկ ՀՖՖ-ին՝ Ազգային հավաքականը դարձնել քաղաքական կուսակցություն

Մինչ համայն հայաստանյան ֆուտբոլասեր հասարակությունը խորը հիասթափության ու նիհիլիզմի մեջ է հայտնվել  « Մանչեսթր Յունայթեդի» կազմում Հենրիխ Մխիթարյանի խաղադաշտ դուրս չգալու պատճառով, հայկական ֆուտբոլում շարունակվում է դեմարշը։ Ընդամենը օրեր առաջ Հայաստանի ազգային հավաքականը կրեց մի շարք ջախջախիչ պարտություններ, որոնց արդյուքնում թիմի գլխավոր մարզիչ Վարուժան Սուքիասյանը հրաժարական ներկայացրեց։ Իհարկե, Սուքիասյանը մինչ հրաժարարականը, հասցրեց ավանդական մեղադրանքը ներկայացնել լրագրողներին՝ մարզիկների վնասվածքների համար։  Հայ լրագրողներին թերևս միայն այս մեղադրանքն էր պակասում՝ որպես տեսակ  վերջնականապես ոչնչացնելու համար։

Սակայն սա բոլորովին այլ խնդիր է ու չնայած հավաքականի նախկին մարզիչի կարծիքին, մենք այնուամենայնիվ համարձակվում ենք պնդել, որ հայկական ֆուտբոլի ներկայիս խղճուկ վիճակի համար, մեղավոր են ոչ միայն լրագրողները, այլև այն բարքերը որոնք տարիներ շարունակ արմատացել են այս սպորտաձևում։ Մասնավորապես օրեր առաջ հավաքականի նախկին խաղացող Արթուր Պետրոսյանը նշանակվեց ազգային ընտրանու գլխավոր մարզիչ։ Այս նշանակումը հույսի թույլ նշույլ առաջացրեց, որ հավաքականը դուրս կգա անկումային այս իրավիճակից։ Սակայն այսօր արդեն իր մասին հիշեցրեց Հայաստանի ֆուտբոլի ֆեդերացիայի նախագահ Ռուբեն Հայրապետյանը, որը բառացի նշեց, որ հենց ինքն է որոշելու թե ով կխաղա հավաքականում, ով չի խաղա։

ՀՖՖ նախագահի այս հայտարարությունն արդեն իսկ բավարար է, որպեսզի հօդս ցնդեն հայկական ֆուտբոլի ապագայի մասին բոլոր սպասումները, քանի որ ֆուտբոլում, ինչպես մեր հասարակական-քաղաքական կյանքի տարբեր ոլորտներում, որոշիչ գործոնները ոչ թե պրոֆեսիոնալիզմն է այլ վարչական ղեկավարների անձնական ամբիցիաներն ու քմահաճույքները։ Նման իրավիճակը հաղթահարելու համար, հարկավոր է ոչ միայն ազատվել նման ղեկավարներից, այլև ընդհանրապես համակարգային փոփոխությունների ենթարկել այդօրինակ բոլոր կառույցները կամ ուղղակի հրաժարվել ֆուտբոլ սպորտաձևից, իսկ ֆուտբոլային ակումբները վերածել քաղաքական կուսակցությունների, առավել ևս որ ներկայումս Հայաստանում նախընտրական շրջանն է և գրեթե ամեն օր մենք լսում ենք  ինչ-որ մեկի կողմից  կուսակցություն «բացելու» հայտարարություններ։