Բարգրատաշենի անցակետում ավտոմեքենաները ստուգվում են 100 տոկոսանոց ճշգրտությամբ

ՀԱՍԱՐԱԿՈՒԹՅՈՒՆ 4 Նոյեմբեր, 2016 18:12

Բագրատաշենի սահմանի արդիականացված անցման կետում մեկ բեռնատար մեքենայի զննման գործընթացը տեւում է ընդամենը 10-15 րոպե:

Նախնական զննումն անցնելուց, ինչպես նաեւ որեւէ կասկածելի բեռ հայտնաբերելուց հետո մեքենան տեղափոխվում է հետագա ավելի մանրակրկիտ զննման:

«Արմենպրես»-ի հաղորդմամբ՝ դեռեւս 2012 թվականին ՀՀ կառավարության եւ Միավորված ազգերի կազմակերպության զարգացման ծրագրի միջեւ ստորագրված «ՀՀ պետական սահմանի «Բագրատաշեն», «Բավրա», «Գոգավան» անցման կետերի արդիականացում» ծրագրի գլխավոր կապալառուի ղեկավար Երվանդ Հովհաննիսյանի խոսքով՝ անցակետում մեքենաները ստուգվում են 100 տոկոս ճշգրտությամբ:

«Սարքը հնարավորություն է տալիս մոտ 30 սմ-անոց մետաղական պատի հետեւում օրինակ 1 մմ-անոց ձող կամ ինչ-որ օտար իր հայտնաբերել: Այն զննում է մեքենան վերեւից ներքեւ: Նման սարքավորում նախկինում էլ կար, բայց այն զիջում էր սրան. սա նոր մոդելն է եւ նախատեսված է ավելի մանրակրկիտ զննման համար: Rapiscan-ը անգլիական ընկերություն է, որը նմանատիպ ռենտգեն սարքերի հիմնական մատակարարն է աշխարհում»,- լրագրողների հետ զրույցում ասաց նա:

Արդիականացված անցակետում կա լվացման կետ մեքենան մաքրելու եւ ֆիզիկական զննումն ավելի ճշգրիտ իրականացնելու համար:

Տարածքում տեղակայված է նաեւ վարչական մասնաշենքը, որը ներառում է մաքսային ծառայությունը, ազգային անվտանգության ծառայությունը, անմաքս առեւտրի խանութի (Duty Free) սրահը, բանկերի հատվածը, Առողջապահության նախարարության բուժ եւ կարանտինային կետը, Գյուղնախարարության սննդամթերքի պետական անվտանգության ծառայության Բագրատաշենի սահմանային հսկիչ կետը, որտեղ պահվում է համապատասխան սննդամթերքը հետագա զննման համար: