Բագրատաշենի, Գոգավանի եւ Բավրայի անցակետերի կառուցումը ճիշտ կազմակերպելու համար ներդրվել են անհրաժեշտ ջանքերը

 «ՀՀ պետական սահմանի «Բագրատաշեն», «Բավրա», «Գոգավան» անցման կետերի արդիականացում» ծրագրի շինարարության պատասխանատու «ՍԱԴԵ» կոնսորցիումի հայաստանյան մասնաճյուղի կառավարիչ Շահին Բուտուիլան տարածքին ծանոթանալու համար շատ ժամանակ չի ունեցել, սակայն վստահեցնում է, որ ներդրվել են անհրաժեշտ բոլոր ջանքերը աշխատանքը ճիշտ կազմակերպելու համար:

«Նախեւառաջ արվել է փաստաթղթերի ամբողջական ուսումնասիրություն` հասկանալու, թե ինչ է անհրաժեշտ շահառուին, բնականաբար, հաշվի ենք առել նրանց կարիքները, այնուհետեւ նախապատրաստել ենք նախագիծը՝ սկզբում նախնական, հետո ավելի մանրակրկիտ, որից հետո վերջապես սկսվել է շինարարությունը: Եվ այս ամենը տեւել է երեք տարի»,-«Արմենպրես»-ի հաղորդմամբ՝ լրագրողների հետ զրույցում նշեց նա:

Մեր այն հարցին, թե որոնք են եղել հիմնական դժվարությունները, Շահին Բուտուիլան պատասխանեց. «Դժվարությունները կապված էին այն հանգամանքի հետ, որ մենք աշխատում էինք շահագործվող տեղանքում, ինչպես նաեւ կապված էին փաստաթղթերի հաստատում ստանալու հետ»,-ասաց Շահին Բուտուիլան:

«ՀՀ պետական սահմանի «Բագրատաշեն», «Բավրա», «Գոգավան» անցման կետերի արդիականացում» ծրագրի շրջանակում նոյեմբերի 4-ին շահագործման հանձնվեցին Բագրատաշենի եւ Գոգավանի անցակետերը, իսկ Բավրայի անցակետը շահագործման կհանձնվի մինչեւ տարեվերջ: