Քրիստինե Պեպելյանը, Լանա Խաչատրյանը, Անահիտ Շահբազյանը Սոնա Ռուբենյանի առաջին մենահամերգին (լուսանկարներ)

Tert.am Life-ը գրում է

Օրեր առաջ «Շանթ» հեռուստաընկերության «Arena Live» տաղավարում կայացավ երգչուհի Սոնա Ռուբենյանի առաջին մենահամերգը:

Tert.am Life-ի հետ զրույցում երգչուհն նշեց, որ արդեն պահը հասունացել էր եւ նա ուներ մենահամերգի ծրագիր:

«Մինչ այս միշտ ցանկացել եմ մենահամերգով ներկայանալ, բայց ինչ-որ մի բան խանգարել է եւ չի ստացվել: Երևի, այդքան էլ ստեղծագործական առումով պատրաստ չէի մենահամերգի, իսկ հիմա ունեմ հեղինակային երգեր եւ մենահամերգի պատրաստ ծրագիր, որը վաղ թե ուշ ներկայացնելու էի: Այս ամենը համընկավ «Շանթ» հեռուստաընկերության «Arena Live»-ի նկարահանումների հրավերի հետ եւ ես ընդունեցի առաջարկը»,- ասաց Սոնան:

Սոնայի երգերի խոսքերի հեղինակը իր մայրն է: Երգչուհու խոսքով՝ ինքն ու իր մայրը շատ լավ են հասկանում իրար. «Իմ երգերի խոսքերի հեղինակը հիմնականում մայրս է, երաժշտությանը՝ ես: Մենք հիմնականում միասին ենք գրում եւ կարծում եմ, որ մեր համագործակցությունը ստացվում է: Բացի այս նաեւ ունեմ համագործակցություններ Ավետ Բարսեղյանի եւ Արսեն Գրիգորյանի հետ: Եթե երգը լսում եմ եւ հոգուս հարազատ է միանգամից սիրում եմ ու երգում եւ կապ չունի, թե ով է հեղինակը»:

Նշենք, որ համերգային ծրագիրը վարում էր Գարիկ Պապոյանը: Վերջինս հետաքրքիր զրույց անցկացրեց Սոնայի հետ՝ բացահայտելով Սոնայի առաջին քայլերը երգարվեստ:

«Գարիկին շատ եմ սիրում: Իր սրամտությունը չափ ու սահման չունի: Ժամերով կարող ես խոսել նրա հետ, միեւնույն է հետաքրքիր կլինի: Իմ առաջին քայլերի մասին շատ եմ խոսել, որ 5 տարեկանում եմ Երգի պետական թատրոն ընդունվել, այլ ոչ թե 7-ում, բայց այս անգամ ավելի անմիջական զրույց ստացվեց»,-նշեց Սոնան:

Բացի այդ Գարիկը ներկայացնում էր Սոնայի ֆեյսբուքյան գրառումները եւ զրուցում դրանց մասին:

Համերգին ներկա էին Քրիստինե Պեպելյանը, Լանա Խաչատրյանը, Անահիտ Շահբազյանը եւ շատ ուրիշներ:

Նշենք, որ նոյեմբերի 13-ին Vitamin ակումբում Գարիկը եւ Սոնան կներկայանան մենահամերգով: