Կայացավ ապրիլյան պատերազմի հերոս Ադամ Սահակյանի գրաֆիկական աշխատանքների ցուցահանդեսը (տեսանյութ)

ՀՀ կառավարությանն առընթեր քաղաքաշինության պետական կոմիտեի Ալ. Թամանյանի անվան ճարտարապետության ազգային թանգարան-ինստիտուտի «Թամանյան» սրահում այսօր բացվեց ապրիլյան պատերազմի հերոս, Ճարտարապետության և շինարարության Հայաստանի ազգային համալսարանի ուսանող Ադամ Սահակյանի գրաֆիկական աշխատանքների հետմահու ցուցահանդեսը: Ցուցահանդեսը տևելու է մեկ շաբաթ։ Ներկայացված են Ադամի 20 աշխատանքները, որոնց զգալի հատվածը անավարտ է մնացել, ինչպես նաև Ադամի լուսանկարները։

Tert.am-ի հետ զրուցում Ադամ Սահակյանի մայրը՝ Գայանե Անտոնյանը, նշեց, որ ցուցահանդեսին ներկայացված ամեն մի աշխատանք իր համար մասունք է, որդուց թողած հուշ։ Հայրը՝ Խաչիկ Սահակյանը, մեզ հետ զրուցում նշեց, որ որդին դեռ մանկուց բարձրաձայնել է շինարար, ճարտարապետ լինելու իր ցանկության մասին, բայց հայրենիքի պաշտպանության համար գիտակցված զոհվել է։

«Նրանք պայքարել են 4-5 ժամ, սպանել են հակառակորդի հատուկ նշանակության ավելի քան 100 ջոկատայինների: Ցավոք, բոլորը 8-ը զոհվել են, ամենավերջում միայն Ադամն էր մնացել, նա ոչ մի քայլ չի նահանջել՝ կյանքը տալով հայրենիքի համար»,-հիշեցրեց Խաչատուր Սահակյանը։

Ցուցահանդեսին մասնակցում էին նաև ԱԺ փոխխոսնակ Հերմինե Նաղդալյանը, Կառավարությանն առընթեր քաղաքաշինության պետական կոմիտեի նախագահ Նարեկ Սարգսյանը։

Լրագրողների հետ զրուցում Նարեկ Սարգսյանը նշեց, որ Ադամը կարող էր տաղանդավոր ճարտարապետ դառնալ. «Հպարտանում ենք, որ նրա նման երիտասարդը կյանքը զոհել է հանուն հայրենիքի»:

Մանրամասները՝ տեսանյութում: