«Փոխնակ մայրը» հեռուստասերիալի դերասանուհի Թամարա Գեւորգյանը՝ իր մասնակցությամբ նոր ֆիլմի մասին

«Փոխնակ մայրը» հեռուստասերիալում Կիկիին մարմնավորող երիտասարդ դերասանուհի Թամարա Գեւորգյանն այս շրջանում նկարահանվում է նոր գեղարվեստական ֆիլմում: Այս մասին NEWS.am STYLE-ին պատմեց դերասանուհին՝ ներկայացնելով ֆիլմի եւ իր կերպարի վերաբերյալ մանրամասներ.

«Ֆիլմի անունը դեռ վերջնական որոշված չէ: Նախնական տվյալներով այն կոչվում է «Դիլեմա»: Նկարահանման աշխատանքները երկու օր առաջ ենք սկսել, բայց այն երեւի դեռ մեկ ամսից ավել կնկարահանվի: Ռեժիսորը Ֆիլիպ Պողոսյանն է՝ շատ հետաքրքիր երիտաասարդ, որին որպես դերասանուհի՝ միանգամից վստահեցի: Չնայած իր երիտասարդ տարիքին՝ նա շատ պահանջկոտ է: Հենց նրանից եմ ստացել ֆիլմում նկարահանվելու առաջարկը: Ինքս լինելով թատրոնի եւ կինոյի նվիրյալ՝ հաճելիորեն հետեւում եմ Ֆիլիպի նվիրվածությանը արվեստին:

Ինձ ֆիլմը հետաքրքրեց նաեւ նրանով, որ այստեղ աշխատում են հիմնականում երիտասարդ կադրեր, որոնց մեր սերունդը սովոր է քննադատել: Ուզում եմ՝ ֆիլմի շնորհիվ հասկանան, թե մենք, իրականում, ինչերի ենք ընդունակ: Հուսով եմ՝ այս ամենից պատվով դուրս կգանք»,-ասում է Թամարան, որը ֆիլմում մարմնավորում է գլխավոր հերոսուհուն՝ Մարիային.

«Այս կերպարը հետաքրքիր է իր ինքնուրույնությամբ ու սկզբունքային լինելով: Այն ամբողջությամբ տարբերվում է «Փոխնակ մայրը» հեռուստասերիալի իմ կերպարից: Որպես դերասանուի՝ դեռ չեմ ավարտել կերպարին «բացահայտելու» գործընթացը: Մարիան բազմաշերտ կերպար է, բայց հուսով եմ՝ ինձ կհաջողվի լիովին հասկանալ նրան»:

Թե ովքեր են լինելու ֆիլմում Թամարայի խաղընկերները, դեռեւս ամբողջությամբ պարզ չէ, քանի որ մի շարք կերպարներ առայժմ հաստատման փուլում են: Դերասանուհու խոսքով՝ հավանական է, որ ֆիլմը մեծ էկրաններին հայտնվի գարնանը.

«Ցավոք սրտի՝ այլ մանրամասներ այս պահին չեմ կարող ներկայացնել, բայց նշեմ, որ սպասելիքներս մեծ են... Հուսով եմ՝ դրանք կարդարանան»:

Սյունե Առաքելյան

NEWS.am STYLE