Մեր արտադրանքը երեխաների համար չէ, իսկ ծնողները ընտրում են` թույլ տան իրենց երեխաներին դիտել այն, թե ոչ. Հայկ Մարության

Life.panorama.am-ը գրում է.

Արդեն երկար ժամանակ է, ինչ Հայկ Մարությանն ու Մկրտիչ Արզումանյանը ոչ միայն չեն համագործակցում միմյանց հետ, այլեւ չեն էլ թաքցնում, մեղմ ասած, վատ հարաբերությունները: Չնայած դերասանները ոչ մի կերպ չեն ուզում խոսել իրար մասին ու բացառում են կրկին համագործակցությունը, սակայն Հայկո-Մկո զույգի սիրահարները չեն մոռանում նրանց համատեղ հումորային ծրագրերն ու շարունակում հույս ունենալ, որ մի օր սիրված զույգը կրկին միասին կներկայանա:

Վերջին շրջանում Հայկոն ու Մկոն հանդես եկան առանձին ստեղծած սիթքոմներով, ինչը հեռուստադիտողի մոտ կրկին ցանկություն առաջացրեց նրանց միասին տեսնել: Այսօր համացանցում տարածված հերթական հրապարակման մեջ ասվում է, որ «Ազիզյաններ»-ում առկա գռեհիկ հումորը եւ «Ռեստարտ 2020»-ի ձանձրացնող ու միապաղաղ սցենարը աններելի է Հայկի եւ Մկոյի պարագայում, ու կարծես թե կոչ է արվում հայտնի մուլտֆիլմի միտքը` «Ребята, давайте жить дружно»:

Թեմայի շրջանակում Life.panorama.am-ը կապ հաստատեց Հայկ Մարությանի հետ, ով մեզ հետ զրույցում նշեց.

«Այդ հարցը վաղուց փակված է ու ես բազմիցս եմ նույն նախադասությամբ մեկնաբանություններ տվել: Այլեւս չեմ անդրադառնա այդ թեմային,, քանի որ ոչինչ չի փոխվել, իմ կյանքում էլ ամեն բան բարիդրացիական է:  Չեմ էլ հետաքրքրվել, թե ինչ են խոսում համացանցում, քանի որ այսօրվա  ինձ հետաքրքող միակ բանը Թրամփն է, որ ի ուրախություն ինձ հաղթեց ԱՄՆ-ի նախագահական ընտրություններում. Ես նրան էի սատարում»:

Անդրադառնալով «Ազիզյաններ» սիթքոմին` հարցին, թե Հայկն ի՞նչ արձագանքներ է լսել նոր սիթքոմի վերաբերյալ եւ արդյոք նրա սպասելիքները արդարացված են, պատասխանեց.

«Քանի որ դեռեւս միայն կաբելային հեռարձակմամբ է հնարավոր տեսնել «Ազիզյանները», ուստի իմ ընտանիքն էլ շատերի նման սպասում է ավանդական հեռուստատեսային ցուցադրությանը, որը հույս ունեմ շատ չի ուշանա: Ինչ վերաբերվում է արձագանքներին` պետք է ասեմ, որ ի զարմանս ինձ դրանք արդեն բավականին շատ են: Կարծում էի, քանի դեռ հեռուստատեսությամբ չի հեռարձակվել, ավելի քիչ մարդիկ կդիտեն, բայց արի ու տես, որ հակերները հասցրել են տարածել համացանցում ու դիտողներն էլ բավականին շատ են: Ինքս իմ բոլոր աշխատանքների վերաբերյալ ավելի շատ հետաքրքրվել եմ անծանոթ մարդկանց կարծիքներով, քանի որ մտերիմներիս վերաբերմունքը շատ սուբյեկտվիվ կլինի: Ինչեւէ, ուրախ եմ, որ այս կարճ ժամանակահատվածում բանկում, խանութում, անգամ տարադրամի փոխանակման կետում ինձ անծանոթ մադիկ են մոտեցել ու ասել, որ շատ են հավանում մեր նոր աշխատանքը, ինչն, իհարկե, շատ ոգեւորիչ է»:

Մեր նկատառմանը` շատերը կարծում են, թե «Ազիզյաններ»-ում գռեհիկ ու ցենզուրայից դուրս հումորներ են արվում, Հայկ Մարությանը ընդգծեց.

«Սկսած «Կարգին հաղորդումից», մինչեւ «Սուպեր մամա» մենք ոչ մի անգամ չենք աշխատել երեխաների համար: Միշտ էլ մեր արտադրանքները նախատեսված են եղել 12 տարեկաններից բարձր հեռուստադիտողի համար: «Ազիզյանները» եւս բացառություն չէ, մենք հավատարիմ ենք մնում հումորի մեր տարբերակին, որը տարիներ շարունակ եղել է: Մենք հայտարարում ենք, որ մեր արտադրանքը երեխաների համար չէ, իսկ ծնողները ընտրում են` թույլ տան իրենց երեխաներին դիտել այն, թե ոչ: Միաժամանակ նշեմ, որ մինչ այսօր հնչած կարծիքներում երբեք չեմ լսել, թե «Ազիզյաններ»-ում գռեհիկ հումոր կա, ու ինքս էլ չեմ կարծում, որ մեր հնչեցրած հումորը ցենզուրայից դուրս է: Միշտ ասել եմ, եթե սեղանի շուրջ ցենզուրայից դուրս անեկդոտ ես պատմում ու բոլորը ծիծաղում են` առանց կենտրոնանալու ցենզուրայի վրա, նշանակում է անեկդոտդ որակով է ու ծիծաղելի, իսկ եթե անեկդոտը հետաքրքիր ու ծիծխաղելի չէ, ապա ամենաչնչին բառը ցենզուրայից դուրս կորակվի. յուրաքանչյուր հումորային նախագծում գլխավորը որակն է»:

«Ինչ վերաբերվում է սիթքոմի նկատմամբ ունեցած սպասելիքներին` պետք է ուրախությամբ նշեմ, որ «Արմենիա TV»-ն կատարել է բոլոր պահանջները, որ մենք ունեինք, կապված տեխնիկական, տաղավարային եւ այլ հարցերի հետ, ավելին` մեր տաղավարը Հայաստանում, կարծում եմ նաեւ տարածաշրջանում, լավագույնն է համարվում: Մենք մեր վերջնական արդյունքից շատ գոհ ենք ու գործում ենք հեռուստատեսության օրենքներին համապատասխան»,- ավարտեց Հայկ Մարությանը: