Life.panorama.am-ը գրում է.
Դերասանուհի Լուսինե Հովակիմյանը Life.panorama.am-ի այսօրվա զրուցակիցն է: Վերջին շրջանում «Թաքնված սեր» հեռուստասերիալում նկարահանվող դերասանուհին պատմել է ոչ միայն աշխատանքի, այլեւ ընտանիքի մասին:
«Տարիներ առաջ ավարտելով Թատրոնի եւ կինոյի պետական ինստիտուտը մի որոշ ժամանակ աշխատեցի Մհեր Մկրտչյանի անվան արտիստական թատրոնում: Սակայն այստեղ մեկ տարի հասցրի մնալ, քանի որ ծնվեց առաջնեկս, ու ուզում էի ժամանակիս մեծ մասը բալիկիս նվիրել: Հեռուստասերիալներում էլ արդեն երկար ժամանակ է, ինչ նկարահանվում եմ, տարիներ առաջ անգամ միաժամանակ երեք հեռուստասերիալներում էի նկարահանվում»,- գործունեության մասին խոսելիս` պատմեց Լուսինեն ու հայտնեց, որ այժմ թատրոնում չի աշխատում կրկին նույն պատճառով` ցանկանում է շատ ժամանակ հատկացնել ընտանիքին:
«Թաքնված սեր» հեռուստասերիալում իր մարմնավորած կերպարի մասին խոսելիս` դերասանուհին պատմեց.
«Մարմնավորում եմ գլխավոր հերոսուհիներից մեկին, ով շատ բարի է: Պետք է նկատեմ, որ ես սիրեցի Մանանին, նա զուսպ, հավասարակշռված ու չափազանց բարեհոգի է, ով շատ է տառապել իր կյանքում, անցել է սարսափելի դժվար ճանապարհ եւ անգամ իր կամքից անկախ` հրաժարվել է իր երեխայից, ինչը կնոջ համար թերեւս ամենասարսափելին է: Այս կինը այդ ցավով ապրում է արդեն 20 տարի, նա այդ ընթացքում անձնական կյանք չի ունեցել ու ապրել է մի կնոջ կողքին, ով իր թշնամին է: Մանանը իսզբանե խաբված է եղել, նա մի կողմ է դրել իր անձնական երջանկությունը, քանի որ հասկացել է` այդ պարագայում նա կդժբախտացնի երեք երեխաների ու իր սիրած տղամարդու կնոջը»:
Դերասանը կերտած յուրաքանչյուր կերպարին իրենից որոշ բաներ հաղորդում է, միաժամանակ նաեւ իր հերոսից վերցնում է բնավորության գծեր, որոնք մինչ այդ չի ունեցել: Մեր նկատառմանը, թե Լուսինեն Մանանի կերպարի հետ ի՞նչ առնչություն ունի, պատասխանեց.
«Համամիտ եմ, դերասանը ինչպես տալիս, այնպես էլ վերցնում է որոշ գծեր իր կերտած հերոսից, նաեւ զգուշանում որոշ հարցերում, որ չնմանվի հանկարծ: Այս պարագայում, ես, որպես կին, հաստատ չէի ցանկանա այնքան թույլ լինել, որ հրաժարվեի իմ երեխայից: Ինչ վերաբերվում է մեր նմանություններին, ես էլ բարության կողմնակից եմ»:
«Լիալուսին», «Անծանոթը», «Մաեստրոն» եւ «Անուրջները» հեռուստասերիալներից հայտնի դերասանուհին, փաստորեն, հեռուստադիտողին միայն իր կերպարներով ծանոթ չէ, Լուսինե Հովակիմյանի ձայնը հեռուստադիտողը արդեն տասը տարուց ավելի է, ինչ լսում է հեռարձակվող արտասահմանյան ֆիլմերում:
«Երկար ժամանակ է, ինչ զբաղվում եմ կրկնօրինակմամբ, դեռ ինստիտուտը չէի ավարտել, որ սկսեցի այդ աշխատանքը: Պետք է ասեմ, որ կրկնօրինակումը իրականում շատ բարդ ու աշխատատար է: Արդյունքում մենք վերարտադրում ենք ուրիշի խաղը. նայելով տվյալ արտիստի խաղին` պետք է փորձես նրա ձայնի տոնը, նրա էմոցիան, բայց քո ձայնի միջոցով տալ հեռուստադիտողին, ընդ որում տալ ոչ ավել, ոչ պակաս, այլապես հեռուստադիտողը չի հավատա իր տեսածին ու լսածին»,- ընդգծեց Լուսինեն:
Աշխատանքներից շատ ժամանակ հրաժարված դերասանուհու համար ամենակարեւորը ընտանիքն է.
«Ամուսինս իմ համակուրսեցին է, սակայն առաջին կուրսից նա հասկացավ, որ ոլորտն իրենը չէ ու որոշեց տնտեսագիտական գիտելիքներ ձեռք բերել: Այսօր նա բիզնեսով է զբաղվում ու դեմ չէ, որ ես գործեմ այս ասպարեզում: Մենք ունենք երկու հրաշք բալիկներ, տղաս ութ տարեկան է, աղջիկս` երկու: Իմ ձեռքբերումը իմ ընտանիքն է, ես ավելի շատ ընտանիքի մարդ եմ, սիրում եմ ժամանակս տրամադրել երեխաներիս ու ամուսնուս»,- պատմեց Լուսինեն ու հավելեց.
«Թեեւ ես շատ եմ սիրում իմ մասնագիտությունը, փորձում եմ հնարավորինս որակյալ այն իրականացնել, բայց չէի ցանկանա, որ երեխաներս ընտրեն իմ ուղին. Կցանկանամ, որ նրանք անհոգ ու հանգիստ կյանքով ապրեն, իսկ արվեստի ոլորտում այնքան էլ հնարավոր չէ անհոգ կյանք ունենալ»:
