ԱՄԷ-ի ներդրողները պատրաստակամություն են հայտնել ներդրումներ կատարել հայաստանյան հյուրանոցաշինության մեջ

ՀՀ նախագահ Սերժ Սարգսյանի՝ Արաբական Միացյալ Էմիրություններ այցի ընթացքում բավական արդյունավետ հանդիպումներ տեղի ունեցան: Այս մասին «Արմենպրես»-ի հետ զրույցում նշեց ՀՀ  տնտեսական զարգացման և ներդրումների նախարար Սուրեն Կարայանը` ամփոփելով ՀՀ նախագահի այցը Էմիրություններ:

«ՀՀ նախագահը Էմիրությունների բիզնես միջավայրին ներկայացրեց հանրապետության ներդրումային դաշտը, թե ինչ ներուժ կա, որ Հայաստանը ներգրավի ներդրումներ: Որոշակի պայմանավորվածություններ ձեռք բերվեցին, որ երկկողմ տնտեսական հարաբերությունները զարգացնելու համար աշխատանքները շարունակվեն, փոխադարձ այցեր կատարվեն»,-ասաց Սուրեն Կարայանը:

Նախարարը նշեց, որ Արաբական Միացյալ Էմիրությունների գործընկերները հետաքրքրված են համագործակցել  գյուղատնտեսության ոլորտում, մասնավորապես, ներդրում կատարել ջերմոցային տնտեսությունում, ինչպես նաև սննդի արդյունաբերության մեջ, հետաքրքրություն կա զբոսաշրջության, ենթակառուցվածքների նկատմամբ: Բիզնես-ոլորտի ներկայացուցիչները պատրաստակամություն են հայտնել ներդրումներ կատարել հյուրանոցաշինության մեջ:

Ներդրումային ընկերությունների ղեկավարների հետ հանդիպմանը նախագահ Սարգսյանը տեղեկացրել է, որ հայկական կողմը պատրաստել է ներդրումային ռազմավարական փաթեթներ, որոնք գտնվում են իր անմիջական ուշադրության կենտրոնում: Կողջունվի ու անհրաժեշտ աջակցություն կցուցաբերվի Հայաստանի տնտեսության տարբեր ոլորտներում Էմիրությունների ներդրողներին, իսկ խոշորածավալ ներդրումների առկայության դեպքում` հատուկ որոշումով կտրամադրվի առավել արտոնյալ պայմաններ: Նախարար Սուրեն Կարայանը նշեց, որ այդ առաջարկությունը ներդրումային ընկերությունների ղեկավարերին շատ ոգևորեց:

 Նախագահ Սերժ Սարգսյանը նոյեմբերի 9-10-ը պաշտոնական այցով Արաբական Միացյալ Էմիրություններում էր: Այցի շրջանակում նախագահն առանձնազրույց է ունեցել Աբու Դաբի էմիրությանթագաժառանգ, շեյխ Մուհամմադ բին Զայեդ ալ Նահյանի հետ: Եղել են մի շարք այլ պաշտոնական հանդիպումներ: Սերժ Սարգսյանն այցելել է նաև Աբու Դաբիի < /i>Սրբոց Նահատակաց հայկականեկեղեցի, շեյխ Զայեդ Մեծ մզկիթ: ՀՀ նախագահն այցի շրջանակում հանդիպում է ունեցել ԱՄԷ ներդրումային և զարգացման ընկերությունների ղեկավարների հետ: