Երգիչ Նարեկ Մակարյանը նոր բիզնես է հիմնել

Life.panorama.am-ը գրում է.

Երգիչ, դերասան Նարեկ Մակարյանը շուտով կհամալրի բիզնեսմեն աստղերի շարքերը. Այս մասին երգիչն առաջինը պատմեց Life.panorama.am-ին, սակայն նախընտրեց դեռեւս չմանրամասնել բիզնեսի տեսակը.

«Հիմա, երբ չհստակեցված շատ հարցեր կան, չեմ ցանկանա խոսել ու պատմել բիզնեսիս մասին, միայն կարող եմ ակնարկելով ասել, որ իմ ոլորտից շատ հեռու չեմ գնացել, այն փրոդաքշըն է, որի շրջանակում առավել մեծ կլինի ներգրավվածությունս այս ոլորտ: Ի վերջո, ես չէի կարող արագ սննդի կետ ունենալ, քանի որ այդպես սիրով չէի զբաղվի այդ աշխատանքով. այնպես որ պետք է շատերի համար հասկանալի լինի, թե բիզնեսս ինչ բնույթ ու ուղղվածություն կունենա»,- նշեց Նարեկ Մակարյանը:

Հարցին, թե բիզնեսի ստեղծման ընթացքում երգը կտուժի՞, թե առջեւում նոր աշխատանքներ են սպասվում, պատասխանեց. «Իհարկե, մի որոշ ժամանակ ուժերս ու միջոցներս կհատկացնեմ բիզնեսին, քանի որ ահռելի մեծ գումարներ է պահանջում սեփական գործ հիմնելը, սակայն հաջորդ տարվա սկզբին նաեւ հենց բիզնեսիս տեսակից ելնելով շատ ավելի ակտիվ կգործեմ ու մեծ թվով երգեր, տեսահոլովակներ կներկայացնեմ: Անշուշտ, հիմա էլ մի շարք երգեր կան ձայնագրման ստուդիայիում, որոնք իրենց հերթին են  սպասում»:

Մեր նկատառմանը, թե ինչ միջոցներով է երգիչն իրեն ծախսատար տեսահոլովակներ ու հիմա էլ արդեն բիզնես թույլ տալիս, Նարեկը ժպիտով նկատեց.

«Իհարկե, հարուստ տատիկ չունեմ, ով իր ժառանգությունը կտակել է ինձ, սակայն ունեմ մեծ ցանկություն ու աշխատասիրություն, որի շնորհիվ փորձում եմ հասնել նպատակներիս: Ես անդադար աշխատում եմ, ամեն ինչ անում, որպեսզի մտքումս պտտվող մտքերը իրականություն դառնան ու, կարծես թե, ստացվում է: Ես մշտապես փորձում եմ անել բաներ, որոնք իմ ուժերից վեր են ու այդպիսով նոր հորիզոնների հասնեմ»:

Վերջում հետաքրքրվելով, թե Նարեկի` վերջերս գողացված մոտոցիկլետը հայտնաբերվել է արդյոք, երգիչը նշեց.

«Ոչ, դեռեւս չի հայտնաբերվել ու թե իմ, թե ոստիկանության աշխատանքները շարունակվում են այդ ուղղությամբ: Իհարկե, ինքս որոշ տեղեկությունների արդեն տիրապետում եմ, սակայն դա փակ ինֆորմացիա է ու բարձրաձայնել չեմ կարող: Միաժամանակ,  ինձ հիմա էլ հաճախ կարող են տեսնել մոտոցիկլով, քանի որ ունեմ շատ ընկերներ, ովքեր վարում են: Մինչ կրկին իմն ունենալը, ես իմ հաճույքը լրացնում եմ ընկերներիս մոտոցիկլները վարելով»: