Հայաստանում ուղևորափոխադրումների ծավալները նվազել են, բեռնափոխադրումներինը՝ աճել

Հայաստանում 2016 թվականին հունվար-սեպտեմբերին ուղևորափոխադրումների ընդհանուր ծավալը կազմել է 153 մլն 510,7 մարդ: ՀՀ Ազգային վիճակագրական ծառայության հրապարակած տվյալները, նախորդ տարվա նույն ժամանակահատվածի նկատմամբ այն նվազել է 0,9 տոկոսով:

Այդ թվում մեծ մաս են կազմում ավտոմոբիլային ուղևորափոխադրումները՝ շուրջ 136 մլն 185,8 մարդ՝ նախորդ տարվա համեմատ նվազելով 1 տոկոսով:

2016 թվականի հունվար-սեպտեմբերին աճել է օդային ուղևորափոխադրումները՝ կազմելով 1 մլն 549,4 հազար մարդ: Նախորդ տարվա նույն ժամանակահատվածի նկատմամբ ցուցանիշն ավելացել է 5,6 տոկոսով: 1,9 տոկոսով աճել են նաև երկաթուղային ուղևորափոխադրումները՝ կազմելով 276 հազար մարդ:

Միևնույն ժամանակ նվազել է էլեկտրատրանսպորտային ուղևորափոխադրումը՝ շուրջ 0,2 տոկոսով: 2016 թվականի հունվար-սեպտեմբերին այն կազմել է 15 մլն 499,5 հազար մարդ:

2016 թվականին հունվար-սեպտեմբերին բեռնափոխադրումների ընդհանուր ծավալը կազմել է 14 մլն 171,2 հազար տոննա: ՀՀ Ազգային վիճակագրական ծառայության հրապարակած տվյալներով, նախորդ տարվա նույն ժամանակահատվածի նկատմամբ այն աճել է 88 տոկոսով:

Այդ թվում մեծ մաս են կազմում ավտոմոբիլային բեռնափոխադրումները՝ շուրջ 11 մլն 246.6 հազար տոննա՝ նախորդ տարվա համեմատ աճելով 2.5 անգամ:

2016 թվականի հունվար-սեպտեմբերին զգալի աճել է նաև օդային բեռնափոխադրումները՝ կազմելով 11.5 հազար տոննա: Նախորդ տարվա նույն ժամանակահատվածի նկատմամբ այն ավելացել է 76.9 տոկոսով: Միևնույն ժամանակ նվազել է մայրուղային խողովակաշարային տրանսպորտի տեսակով բեռնափոխադրումը՝ շուրջ 9.6 տոկոսով: 2016 թվականի հունվար-սպետմեբրին այն կազմել է 1 մլն 20.2 հազար տոննա: