Մոլդովայում նախագահի թեկնածու Սանդուն պատրաստվում է բողոքարկել ընտրությունների արդյունքները

Մոլդովայի ընդդիմադիր Գործողության եւ համերաշխության կուսակցության ղեկավար Մայա Սանդուն, որը դարձել Է եվրոպամետ ուժերից նախագահի միասնական թեկնածուն, պատրաստվում Է Սահմանադրական դատարանում բողոքարկել ընտրությունների երկրորդ փուլի արդյունքները: Այդ մասին նա լրագրողներին հայտնել Է մամուլի ասուլիսում:

«Ընտրություններն անցել են բազմաթիվ խախտումներով: Մենք կսպասենք դիտորդների հաշվետություններին, կհավաքենք անհրաժեշտ նյութեր եւ արդյունքները կբողոքարկենք Սահմանադրական դատարանում: Դրանից հետո կորոշենք՝ ինչ ենք անելու այնուհետեւ»,-ասել Է Սանդուն: Նա նաեւ հայտնել Է, որ կպահանջի Կենտրոնական ընտրական հանձնաժողովի նախագահ Ալինա Ռուսուի եւ արտաքին գործերի նախարար Անդրեյ Գալբուրի պաշտոնաթողությունները, որոնց մեղադրել Է արտասահմանում բավարար թվով ընտրական տեղամասեր չկազմակերպելու մեջ:

Ինչպես արդեն տեղեկացվել Է, Ռուսաստանի հետ մերձենալու օգտին հանդես եկող Մոլդովայի Հանրապետության սոցիալիստների կուսակցության (ՄՀՍԿ) ղեկավար Իգոր Դոդոնը հաղթանակ Է տարել երկրի նախագահական ընտրություններում: ԿԸՀ-ի նախնական տվյալներով՝ նա ստացել Է ձայների 52,6 տոկոսը (834 հազար 70 ձայն): Նրա մրցակիցը՝ եվրոպամետ ընդդիմության միասնական թեկնածուն՝ Գործողության եւ համերաշխության կուսակցության ղեկավար Մայա Սանդուն ապահովել Է ընտրողների 47,3 տոկոսի (749 հազար 720 ձայն) աջակցությունը:

«Մենք հաղթանակ տարանք: ԵՍ շնորհավորում եմ Մայա Սանդուին ընտրություններում արձանագրած արժանավայել արդյունքի կապակցությամբ եւ հավաստիացնում եմ, որ լինելու եմ թե նրանց նախագահը, ովքեր քվեարկել են իմ օգտին, թե նրանց, ովքեր դեմ են եղել»,- հայտարարել Է Դոդոնը մամուլի ասուլիսում:

Նա ընդգծել Է, որ նախագահի կարգավիճակում «առաջին այցը կատարելու Է Մոսկվա, որպեսզի նախաձեռնի ՌԴ-ի հետ ռազմավարական գործընկերության վերաբերյալ համաձայնագրի մշակումն ու ստորագրումը, որը նախատեսում Է տնտեսական, սոցիալական եւ քաղաքական համագործակցություն, միասնական մոտեցում մերձդնեստրյան հակամարտության լուծման հարցում, երաշխիքներ Ռուսաստանում գտնվող մոլդովացի աշխատանքային միգրանտների համար», հաղորդել Է ՏԱՍՍ-ը: